दरभंगा. कमला बलान नदी क जलस्तर मे वृद्धि क संगहि बाढ़ दरभंगा जिला मे दस्तक द देलक अछि. जिलाक कुशेश्वरस्थान इलाका मे नदीक जल फैल गेल अछि. यातायात बाधित भ गेल अछि. उसरी, उजुआ-सिमरटोका, तिलकेश्वर, भिंडुआ, कुशेश्वरस्थान उत्तरी क लोक लेल मुख्यालय स संपर्क भंग भ चुकल अछि. एहि ठामक लोकक आवागमन क रास्ता पानी में डूबल अछि. एहि पंचायत क लोक क आवागमन क सहारा केवल नाव रहि गेल अछि.
एम्हर केवटगामा, फकदोलिया, भरडीहा गांव क बीच बांस-बल्ला स बनल चचरी पुल नदी क उफान क कारण बहि गेल. एहि ठामक लोक कए अब एक स दोसर टोल जेबा लेल सेहो नाव क सहारा लिय पडैत अछि.
चौकिया क रमेश पसावान, प्रेम कुमार, रूनी देवी आदि कहैत छथि जे प्रत्येक वर्ष हम सब एहिना डूबैत छी. सब साल एहिना पानी अबैत अछि.कियो देखनिहार नहि अछि. सब साल हमर सबहक इ जीवनक हिस्सा भ चुकल अछि. बाढ़ क समय तीन स चारि मास हम सब बलान क पश्चिमी तटबंध पर झोपड़ी बनाकए बाल-बच्चा क संग रहबा लेल मजबूर रहैत छी.
ओतहि बाढ़ क पानी खेत कए डूबा दैत अछि, कतहु ठेमुन त कतहु डांर तक पानी मे हेल कए फसल अनैत छी. सबस बेसी दिक्कत अगिला चारि मास पशु चारा कए ल कए होइत अछि. भरडीहा क दूध व्यापारी दिनेश यादव, पंकज यादव, छोटकी कोनिया क दिलीप यादव आदि कईटा पशुपालक कहला जे हमलोग साइकिल या बाइक स तटबंध क पूर्वी भाग मे घर-घर जाकर दूध बंटैत छी. ओ कहला जे अब पानी मे हेल कए साइकिल स दूध ल जाय पडैत अछि. किछु दिनक बाद पानीक स्तर बढला पर इ सेहो बंद भ जायत. तखन बस नाव एकटा सहारा. कखनो कखनो त नाव क लेट-लतीफी स दूध फटि जाइत अछि. बड नुकसान होइत अछि. है.