पटना. बिहार मे आठ जून कए लॉकडाउन खत्म भ सकैत अछि. कोरोनाक दोसर लहर कए कम करबा लेल सरकार 8 जून तक लॉकडाउन लगेबाक घोषणा केने अछि. कोरोनाक मामला मे आयल कमी कए देखैत इ कहल जा रहल अछि जे सरकार आब लॉकडाउन कए आगू नहि बढाउत. सरकारक एहि फैसला स आम लोक संग संग कारोबार जगत स जुड़ल लोक कए राहत भेटत.
सूत्र क मानी त सीएम नीतीश कुमार सबटा डीएम स फीडबैक लेलथि अछि आ ओकर आधार पर आगूक रणनीति बनाउल जा रहल अछि. बिहार मे 8 जून क बाद लॉकडाउन क अवधि बढ़ेबा पर अधिकतर जिलाधिकारी सहमत नहि छलाह. हालांकि सब डीएम कए सख्ती बरतबा क अधिकार अछि आ ओ बनल रहत. जिलाधिकारी संक्रमण क स्थिति कए देखैत खास इलाका मे सख्ती बरतबा संग धारा 144 लागू क सकैत् छथि.
जानकारक कहब अछि जे आठ जूनक बाद बिहार मे नाईट कर्फ्यू लागू रहत, मुदा दिन मे लॉकडाउन खत्म भ जायत. ओना एहि पर अंतिम निर्णय सोम दिन कोरोना क्राइसिस मैनेजमेंट ग्रुप क बैसार मे होएत. एतबा मुदा तय अछि जे बिहार मे अनलॉक लागू भेलाक बादो बहुत किछु पर पाबंदी जारी रहत. खास क बच्चाक स्कूल खुलबाक संभावना नहि अछि. कार्यालय में उपस्थिति सेहो सिमित रहत. बाजारक समय अवधि किछु बढि सकैत अछि मुदा होटल आ मौल कए छूट भेट सकैत अछि. सिनेमा घर कए छूट एखन मुश्किल लागि रहल अछि. जेना शादी-ब्याह मे एखन भीड़क छूट नहि भेटत. नियम में किछु बदलाव भ सकैत अछि.
दोसरसमाचार
लॉकडाउन खत्म भेलाक बाद कोरोना गाइडलाइन क पालन करबा पर बेसी जोर रहत. दंड क प्रावधान सख्त होएत. गौरतलब अछि जे राज्य मे कोरोना संक्रमण क रफ्तार मे लॉकडाउन लगलाक बाद 80 प्रतिशत कमी आयल. एखन बिहार मे कोरोना संक्रमित एक्टिव मरीज क संख्या 9 हजार 627 अछि. बिहार क नीतीश सरकार राज्य मे चारि बेर लॉकडाउन क विस्तार केलक आ लॉकडाउन 4 क मियाद 8 जून कए समाप्त भ रहल अछि.
