पटना. बिहार मे कोरोना महामारी कए रोकबा लेल लगाउल गेल लॉकडाउन हटा लेल गेल अछि. मंगलदिन बिहार सरकार क क्राइसिस मैनेजमेंट ग्रुप क बैसार क बाद मुख्यमंत्री नीतीश कुमार एकर एलान केलथि. सीएम नीतीश कुमार ट्वीट केलथि जे राज्य मे लॉकडाउन खत्म कैल जा रहल अछि, मुदा किछु बंधनक संग रातिक कर्फ्यू जारी रहत. इसमाद पहिने इ सूचित क चुकल छल जे सरकार एहि तरहक फैसला ल सकैत अछि. बिहार सरकार कोरोना संक्रमणक मामला मे आयल कमी कए देखैत लोक कए लॉकडाउन स राहत देलक अछि. हालांकि एखनो कईटा बंदिश लागू रहत.
सरकार दिय स जारी नबका गाइडलाइनक अनुसार लॉकडाउन खत्म भेलाक बादो सांझ 7 बजे स भोर 5 बजे तक रात्रि कर्फ्यू जारी रहत. 50 प्रतिशत उपस्थिति क संग सरकारी आ निजी कार्यालय 4 बजे अपराह्न तक खुलत. दुकान खुलबाक अवधि 5 बजे अपराह्न तक रहत. आनलाईन शिक्षण कार्य जारी रहत. निजी वाहन चलेबा मे कोनो परपिट क जरूरत नहि रहत. यह व्यवस्था एक सप्ताह तक लेल अछि. सरकार साफ कहलक अछि जे भीड़भाड़ स बचबाक आवश्यकता अछि.
बिहार मे एखन धरि चारि बेर लॉकडाउन क विस्तार भ चुकल अछि. कोरोना संक्रमण क चेन तोड़बा लेल राज्य सरकार 5 मई कए बिहार मे लॉकडाउन लगेने छल. पहिल बेर 15 मई तक आ फेर एकरा 25 तारीख तक बढ़ाउल गेल. नीतीश सरकार एकरा एक सप्ताह तक बढेबाक फैसला लेलथि फिलहाल लॉकडाउन 4 क अवधि 28 जून तक लेल छल.