दरभंगा: दरभंगा एयरपोर्ट स इंडियो अपन सेवा 5 जुलाई स शुरू करत. स्पाइसजेट एखन असगर एहि एयरपोर्ट स सेवा दैत छल. इंडियो दरभंगा स सेवा देनिहार दोसर कंपनी अछि. इंडिगो कोलकाता आ हैदाराबाद रूट पर सेवा देत. एहि रूट पर स्पाइसजेट पहिने स सेवा द रहल अछि. एहन मे आब ग्रहक ल दूटा विकल्प भ गेल. विकल्प बढला स मैथिल जन कए नहि केवल यात्रा सुगम भेल बल्कि किराया मे सेहो कमीक उम्मीद जगल. जानकार क कहब अछि जे आब टिकट क दर मे सेहो कमी आउत. एकाधिकार दाम कए कम करबा मे बाधक बनल छल. मुदा आब IndiGo क विकल्प स छूटक दौर शुरु होएत.
एकर शुरूआतो भ गेल अछि. विमानन कंपनी इंडिगो दरभंगा स उड़ान सेवा शुरु करबा लेल बुकिंग शुरू कर देलक अछि. एकर संगहि ओ किराया पर अपन साफ संदेश द देलक अछि जे ओकर किराया हर हाल मे स्पाइसजेट स कम रहत. ओना एखन किरायाक अंतर बहुत नहि अछि मुदा इ फासला आगू आओर पैघ होएत. दरभंगा एयरपोर्ट स फ्लाइट क टिकट रेट राहत क पैघ समाद छी. दूनू कंपनीक बीच मुकाबला हर हाल मे जनता लेल शुभ समाद आनत.
इंडिगो 5 जुलाई स दरभंगा एयरपोर्ट स फ्लाइट टिकट बुकिंग चालू केलक अछि. एखन हैदराबाद आ कोलकाता लेल बुकिंग चालू अछि. पांच जुलाई कए स्पाइसजेट दरभंगा स कोलकाता क किराया 4006 रखने अछि त एहि दिन इंडिगो अपन किराया 4005 रुपया रखलक अछि.
एहिना दरभंगा स कोलकाता क बीच क हवाई सफर स्पाइसजेट क फ्लाइट स 3376 म इंडिगो स 3375 रुपया मे होएत. यानि दूनू जगह लेल फ्लाइट टिकट कए इंडिगो स्पाइसजेट स 1 रुपया कम रखलक अछि. किराया मे इ अंतर एखन महज शुरुआत अछि. एकटा समाद अछि जे आगू आओर पैघ अंतर कए स्पष्ट करैत अछि.
ओना हैदराबाद आ कोलकाता स दरभंगा एयरपोर्ट एबाक किराया दूनू इंडिगो आ स्पाइसजेट बराबर रखने अछि. एखन इंडिगो क पहिल फ्लाइट उड़ान नहि भरलक अछि. मुदा ओकर जे रणनीति देखा रहल अछि ओहि स तय अछि जे ओ कोनो हाल मे अपन किराया स्पाइसजेट स कम राखत. जानकार सेहो कहैत छथि जे दरभंगा एयरपोर्ट पर आब स्पाइसजेट आ इंडिगो क बीच प्राइस वॉर शुरू भ चुकल अछि.
दोसर दिस दरभंगा स बाहर रहनिहार लोक बीच एहि गपक खुशी अछि जे आब कम किराया द घर आबि जा सकब. खास क हैदराबाद आ कोलकाता मे रहनिहार सब सोशल मीडिया पर अपन खुशी जाहिर क रहल छथि. ओना दिल्ली समेत अन्य जगहक लोक सेहो आब इंडिगो सेवाक मांग तेज करबाक योजना बना रहल छथि.
उल्लेखनीय अछि जे दरभंगा स इंडिगो सेवा शुरू हेबाक घोषणा पिछला साल नवंबर मे भ गेल छल, मुदा दरभंगा एयरपोर्ट पर जगहक अभाव और कोरोना क दोसर लहर एहि दूनू कारण स सेवा शुरू हेबा मे देरी भेल. विमानन कंपनीक एकटा अधिकारी नाम नहि छपबाक शर्त पर कहला जे दरभंगा स कंपनी कए बहुत उम्मीद छै आ एहि ठाम स आओर शहर लेल जल्द सेवा शुरू होएत. ओ कहला जे किराया हमर कम रहत आ सेवा ककरो स बेहतर देब.