दोसरसमाचार
नव दिल्ली. आइ केंद्र सरकार पैघ फैसला लेलक अछि. सरकार पबजी संग 118 मोबाइल ऐप पर प्रतिबंध लगयबाक फैसला कयलक अछि. इलेक्ट्रॉनिक्स आ सूचना प्रौद्योगिकी मंत्रालय धारा 69ए केर अंतर्गत एहि मोबाइल ऐप्स पर बैन लगयबाक फैसला कयलक अछि. मंत्रालय कतेको शिकायत भेटबाक बाद बैन लगयबाक इ फैसला लेलक अछि. सरकार दिस स’ आइ जारी बयानमे कहल गेल अछि जे इ ऐप राष्ट्रीय सुरक्षाक लेल खतरा छल.
इलेक्ट्रॉनिक्स आ सूचना प्रौद्योगिकी मंत्रालयक दिस स’ जारी बयानमे कहल गेल अछि जे इ मोबाइल ऐप भारतक संप्रभुता, अखंडता, भारतक रक्षा, राज्य सुरक्षा आ सार्वजनिक व्यवस्थाक लेल खतरा छल. मंत्रालय कहलक जे एहन कतेको शिकायत भेटल छल जाहिमे कहल गेल छल जे एंड्रॉइड आ आईओएस प्लेटफॉर्म पर एहन कतेको मोबाइल ऐप अछि जे यूजर्सक सूचना चोरबैत अछि.
मंत्रालय कहलक जे इ ऐप्स अनधिकृत तरीका स’ यूजर्सक सूचना आ डेटा चोरी क’ भारतक बाहर पठा रहल अछि. इ ऐप यूजर्सक डेटाके चोरी क’ रहल अछि आ ओकरा भारत स’ बाहर स्थित अपना सर्वर धरि गैर कानूनी तरीका स’ पहुंचा रहल अछि. एहि डेटाक चोरी भारतक अखंडता, संप्रभुता आ सुरक्षाक लेल खतरा अछि. सरकार कहलक जे डेटाक चोरी चिंताक विषय अछि आ एकरा लेल आपातकालीन डेग उठाओल जयबाक आवश्यकता अछि.
बता दी जे भारत सरकार एहि स’ पहिने टिकटॉक सहित चीनक कतेको ऐप पर प्रतिबंध लगौने छल. जूनक अंतिममे भारत टिकटॉक, हेलो समेत चीनक 59 मोबाइल ऐप पर प्रतिबंध लगौने छल. एकरा बादमे जुलाईक अंतमे सेहो 47 आओर चीनी ऐप पर पाबंदी लगाओल गेल छल.
एहि बेर केंद्र सरकार पबजीक अलावा लिविक, वीचैट वर्क आ वीचैट रीडिंग, ऐपलॉक, कैरम फ्रेंड्स सन मोबाइल ऐप पर पाबंदी लगओलक अछि. लद्दाखमे चीनक संग फेर स’ तनाव बढ़बाक बीच भारतक एहि डेगके कठोर मानल जा रहल अछि.
