दोसरसमाचार
मधुबनी. भगिरथ मां गंगा कए धरती पर लौटा अनने छथि, मिथिलाक तीर्थ कमला कए फेर स हुनकर पुरान धार स जोडबाक प्रयास जल संसाधन विभाग क रहल अछि। एहि काज लेल विभाग परदेस स लौटल मजदूरक उपयोग क रहल अछि। विभागक एहि प्रयास स एक दिस जतय गाम मे बढि रहल बेरोजगारीक समस्या स निपटबा मे मदद भेटत ओतहि इ योजना मिथिलाक तस्वीर बदलि देत। 1954 मे तटबंध बना जाहि नदी सब कए मारबाक प्रयास भेल छल, ओहि नदी सब कए फेर स कलकल अविरल बहेबाक प्रयास क देज गेल अछि। दरभंगा जिलाक जीबछ नदीक बाद मधुबनी जिलाक झंझारपुर प्रखंड क लोहना दक्षिणी पंचायत में पुरान कमला नदी क धार कए 86 साल बाद फेर स अविरल बनेबाक काज जोर-शोर स जारी अछि। इ धार 1934 में आयल भूकंप आ 1935 मे आयल बाढि क बाद नदीक मुख्य धारा स कटि गेल छल आ कालांतर मे सूखा गेल छल। 1935 तक इ मधुबनी क पिपराघाट स दरभंगा तक कमला नदी क धार क रूप मे बहैत छल। 1935 में आयल बाढि क बाद झंझारपुर प्रखंड मे नदी क मुख्य धार पूरब दिस चल गेल आ बलान मे मिल गेल। समय क संग कमला नदीक पुरान धार अपना अस्तित्व खत्म करैत गेल। एहि बीच मिथिला मे पैघ पैघ नेता भेलाह मुदा इ भगिरथ प्रयास 86 साल बाद शुरु भेल अछि। 86 साल पहिने जे धार कलकल अविरल छल तेकरा एक बेर फेर से अविरल धार बनेबाक प्रयास कैल जा रहल अछि। इ काज संपन्न भेला स दरभंगा आ मधुबनीक किसान कए एक बेर फेर पटौनी सुलभ भ जायत। जल संसाधन विभाग नदी कए फेर स जिंदा करबा लेल आकर उड़ाही क कार्य कए मंजूरी देलक अछि आ काज जोर-शोर स भ रहल अछि।
झंझारपुर प्रखंड क लोहना दक्षिणी पंचायत मे कमला नदी क जीर्णोद्धार क काज लेल 49 लाख 91 हजार टकाक मंजूरी देल गेल अछि एहि प्रोजेक्ट मे करीब साढ़े 4 सौ पुरुष आ महिला श्रमकि एक अपन पंचायत मे रोजगार क अवसर भेटल अछि। इलाका मे काफी खुशी अछि. वर्षो बाद परदेस स गाम लौटल मजदूर कए इ चिंता छल जे गाम मे करब की, मुदा अपन पंचायत मे करीब 400 लोक लेल रोजगार देखि सब संतुष्ट अछि। नदी उडाही मे लागल मजदूर क कहब अछि जे आब अपन गाम, अपन पंचायत मे पसीना बहाकए अपन जिला आ राज्यक क कपार बदलब। मेहनती श्रमिक लेल मनरेगा क तहत रोजगार क अवसर उपलब्ध करौउल जा रहल अछि। मजदूरों क जोश देख मिथिला मे बदलाव क स्पष्ट संकेत भेटैत अछि।
जिला प्रशासन दिस स सेहो मजदूर कए काम उपलब्ध कराउल जा रहल छै। जिला अधिकारी निलेश रामचंद्र देउरे क कहब अछि जे मधुबनी जिलाक 21 प्रखंडों मे करीब 90 हजार मजदूर कए रोजगार क दरकार छल, जाहि मे स 88 हजार कए रोजगार उपलब्ध करा देल गेल अछि। मधुबनी जिला मे फिलहाल जल संरचना स संबंधित नहर, पईन आ पोखर क खुदाई क कुल 715 टा प्रोजेक्ट पर काज जारी अछि.
जानकार क कहब अछि जे बाहर स आयल मजदूर क संख्या फौरी तौर पर भले परेशानी क सबब बनल अछि मुदा इ फौज मधुबनी सन पिछड़ल जिला कए विकास क बाट पर ल जेबा लेल पैघ योगदानकर्ता बनत। मधुबनी मे बाहर स आयल मजदूर क स्कील्ड क स्क्रीनिंग क काम सेहो जोर-शोर स जारी अछि। जिला प्रशासन क स्तर पर एहि लेल गंभीरता देखा रहल अछि आ सबस पैघ गप जे जल संसाधन विभाग मे एहि बेर जमीन पर किछु काज होइत देखा रहल अछि। इ विभाग पिछला पांच दशक स कागज पर काज करैत आयल छल।
