दोसरसमाचार
विनीत ठाकुर
मधुबनी । जिला पदाधिकारी शीर्षत कपिल अशोक कहला अछि जे तीन दिनक भीतर अगर दाखिल खारिजक काज शुरू नहि होयत त डाटा आपरेटर क सेवा समाप्त करबाक संगहि अंचल अधिकारी दरमाहा बन्द कएल जायत।
मंगलदिन आन लाईन दाखिल खारिज क समीक्षा क्रम मे जिलाधिकारी पओलाह जे पछिला छ मास दौरान प्राप्त 699 आवेदन मे मात्र तीन टा आवेदनक निपटारा कएल गेल छल। एहि पर ओ डाटा आपरेटर सँ स्पष्टीकरण पूछवाक निदेश दैत चेतौलन्हि जे तीन दिनक भीतर यदि दाखिल खारिज क काज शुरू नहि होयत त डाटा आपरेटर क सेवा समाप्त करबाक संग अंचल अधिकारी दरमाहा बन्द कएल जायत। एहि संबंध मे अनुमंडल पदाधिकारी आ भूमि सुधार उप समाहर्ता के सेहो स्पष्टीकरण पूछवा क निदेश देल गेल।
एहि स पूर्व जिला पदाधिकारी शीर्षत कपिल अशोक मंगल दिन रहिका प्रखंड सह अंचल कार्यालय क औचक निरीक्षण कयल गेल। पंचायत क आंगन बाड़ी केंद्र सं 58 पर मात्र 9 बच्चा क संग केंद्र सेविका विभा देवी आ सहायिका शीला देवी उपस्थित छलीह। सहायिका दस दिन सँ पेषाहार राशि नहि भेटबा क शिकायत कयलन्हि। प्रतीत होईत छल जेना कयक मास सँ बच्चा सब के पोषाहार नहि देल जा रहल छैक। ई सेविका सबहक लापरवाही बूझि एकर जांच करबा क निदेश प्रखंड विकास पदाधिकारी के दे ल गेल ताकि उचित कार्रवाई कयल जा सकय।
निरीक्षण क क्रम मे प्रखंड कार्यालय मे व्याप्त गंदगी आ गार्ड रूम क अव्यवस्था देखि जिला पदाधिकारी अप्रसन्नता जनौलन्हि। आर टी पी एस काउंटर मे सुबोध कुमार ठाकुर क राशन कार्ड लेल द्ल गेल आवेदन पर सेवा प्रदान तिथि 13- 05-17 छल परंतु अद्यतन सेवा नहि द्ल गेल छल। संबंधित सहायक सँ एहि हेतु स्पष्टीकरण पूछवा क निदेश जिला पदाधिकारी द्वारा देल गेल आ साफ सफाई क संबंध मे प्रखंड नाजिर सँ तीन दिन क भीतर स्पष्टीकरण पूछवाक निदेश देलन्हि। प्रखंड/ अंचल कार्यालय क खिड़की सबहक टूटल शीशा सब के बदलबाक निदेश कार्यपालक अभियंता, भवन प्रमंडल, मधुबनी के देल। राकेश कुमार झा. आधार केंद्र संचालक के बहुत दिन सँ अनुपस्थित रहबाक सूचना पर हुनका विरुद्ध कार्रवाई हेतु विभागीय सचिव के सूचित करबाक निदेश देल । प्रखंड कार्यालय क वरामदा पर राखल ट्राईसाईकिल सब के संबोधित प्रखंड सब के शीघ्र पठेबा हेतु प्रखंड विकास पदाधिकारी के निदेशित कयल।
जिला पदाधिकारी स्वच्छ भारत मिशनक अन्तर्गत शौचालय निर्माण, जियोट्रैगिंग, एम आई एस पर इंट्री तथा लाभुक भुगतान पर असंतोष व्यक्त कयल। प्रखंड विकास पदाधिकारीसँ एकर स्पष्टीकरण पूछवा क निदेश देस गेल। हर घर नल जल, गली नली योजनाक असंतोषजनक. प्रगति क संबंध मे समन्वयक सं स्पष्टीकरण पूछवाक आ हुनका विरुद्ध कार्रवाई हेतु प्रस्ताव देवाक निदेश जिला पदाधिकारी देलन्हि।
प्रखंड विकास पदाधिकारी के क्षेत्र भ्रमण क संग मुखिया, उप मुखिया, पंसस आ वार्ड सदस्य सबहक प्रखंड स्तरीय बैसक आयोजित करबाक निदेश जिला पदाधिकारी द्वारा देल गेल। बैसक मे निदेशक, डी आर डी ए आ जिला पंचायती राज पदाधिकारी सेहो उपस्थित रहता। एहि सबहक पश्चात जिला पदाधिकारी ककरौल दक्षिणी पंचायत क हर घर जल नल योजना क तहत कएल काज सबहक निरीक्षण कएल जाहि मे पी एच ई डी कसहायक अभियंता के जलापूर्ति हेतु गाड़ल गेल बोरिंग क गहराई मापी प्रतिवेदन पठेबाक निदेश देल। निरीक्षण क समय कुमार गौरब, सहायक समाहर्ता (प्रशिक्षु) मो. शोएब , जिला पंचायती राज पदाधिकारी, श्री ब्रजविहारी भगत, निदेशक डी आर डी ए उपस्थित छलाह।
