दोसरसमाचार
आब ‘सेफ जोन’ नहि रहल नेपाल आ बिहार
दूनू देशक पुलिस मे भ रहल बेहतर तालमेल
पटना : भारत आ नेपालक बीच एक्सचेंज आफर अपराधी लेल मुश्किल क देलक अछि। कईटा अपराधी एहि एक्सचेंज आॅफर क तहत गिरफ्तार भ चुकल अछि। कहियो सेफ जोन मे अपराध क आराम करनिहार अपराधी आब भागल-भागल फिर रहल अछि। भटकल क गिरफ्तारी क बाद आब इ साबित भ गेल अछि जे भारतीय अपराधी लेल नेपाल आब सेफ जोन नहि रहल। ज्ञात हुए जे दूनू देश क बीच प्रत्यर्पण संधि नहि अछि, जेकर फायदा अपराधी एखन धरि उठबैत रहल अछि। मुदा आब दूनू देशक पुलिस बेहतर तालमेल क एक स एक अपराधी कए पकडि एक दोसर कए सुपुर्द क रहल अछि। एहि मे यासिन भटकल सन आतंकवादी सेहो शामिल अछि। यासिन भटकल क गिरफ्तारी मे महत्वपूर्ण भूमिकानिभेनिहार मोतिहारी क एसपी विनय कुमार कहैत छथि जे प्रत्यर्पण संधि नहि रहबा स तकनीकी दिक्कत त अछि मुदा बेहतर तालमेल स इ संभव भ रहल अछि। पिछला करीब 9 स 10 मास मे कई सौ अपराधी दूनू देश एक दोसर कए देलक अछि। इ अपराधी सब नहि केवल खूंखार छल, बल्कि ओ अपराधी सेहो पकड़ल जा रहल अछि जे छोट-मोट अपराध क नेपाल भागि जाइत छल। मोतिहारी क एसपी क कहब अछि जे एखन धरि केवल पूर्वी चम्पारण क 80 प्रतिशत भागल अपराधी नेपाल स गिरफ्तार कैल जा चुकल अछि। भारत आ नेपाल दूनू ठामक पुलिस अपराधी क पाछु लागल अछि। पहिने एहन स्थिति नहि छल। भारतीय पुलिस क नेपाल पुलिस क संग कोनो तालमेल नहि छल आ प्रत्यर्पण संधि नहि भेला स अपराधी अपराध केलाक बाद बेखौफ भ कए एक दोसर क देश मे शरण लैत छल, जेकर सीधा असर ओहि ठाम जनता पर पड़ैत छल। बॉर्डर क इलाका मे खौफ मे जीयब आम लोक क मजबूरी छल मुदा नव हालात स आम जनता सेहो खुश अछि। बहरहाल स्थानीय स्तर पर भ रहल एहि बेहतर तालमेल स न केवल अपराधी पकड़ल जा रहल अछि बल्कि दूनू देशक जनता क बीच एकटा नव विश्वास पैदा भ रहल अछि जे पिछला किछु साल मे टूटक कगार पर छल। आइ नेपाल पुलिस क पूरा सहयोग भेट रहल अछि। ज्ञात हुए जे इंडियन मुजाहिद्दीन क आॅपरेशनल हेड यासिन भटकल पिछला दू साल स आराम स नेपाल क पोखरा मे रहि रहल छल, मुदा अचानक एक दिन नेपाल पुलिस क सहयोग स बिहार पुलिस ओकरा धर दबोचलक। इ अपराधी क ऐक्सचेंज क सबस पैघ आफर छल। यासिन भटकल कए गिरफ्तार करब कोनो आसान काज नहि छल। बार्डर स कई सौ किलोमीटर दूर ओ अपन सुरक्षा घेरा मे रहि रहल छल। सबस पहिने ओकरा एकटा मस्जिद मे नवाज पढ़ैत मुखबिर देखलक, जेकर निशानदेही पर एक पैघ आपरेशन कए अंजाम देल गेल। इ संभव भ पाओल नेपाल पुलिस क मदद स। दोसर दिस यासिन भटकल क गिरफ्तारी क एवज मे बिहार पुलिस कम स कम पांच नामी खूंखार अपराधी कए नेपाल कए सौंप देलक अछि, जेकरा कई साल स नेपाल पुलिस ताकि रहल छल। हांलाकि इ अलग बात अछि जे प्रत्यर्पण संधि नहि भेला स एहन गिरफ्तारी क जगह कए तकनीकी तौर पर बॉर्डर बताओल जाइत अछि। ताजा शिकार मे फौजी सिंह, सुनील जयसवाल, बबलू दुबे आदि गिरफ्तार भ चुकल अछि।
इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bhagalpur, bihar news, darbhanga, Hawai seva, latest bihar news, latest maithili news, latest mithila news, maithili news, maithili newspaper, mithila news, patna, saharsa
nik pahal, suwagat