आशीष झा
एक दिस बिहारक विभिन्न शहर कए सजाउल जा रहल अछि त दोसर दिस ललित नारायण मिथिला विश्वविद्यालय प्रशासन दरभंगाक मुख्य आकर्षण राज परिसर कए विकृत करबा लेल आतुर अछि। पढाई लिखाई त एहि विश्वविद्यालय कए सर्वविदित अछि आ एकर धरोहरक प्रति नजरिया सेहो विख्यात भ रहल अछि। पढाई स बेसी राजनीति मे समय देनिहार एहि विश्वविद्यालयक शिक्षक आ पदाधिकारी लागि रहल अछि जेना किरिया खा लेने अछि जे राज परिसर कए नस्तनामूद करि कए दम लेब। विश्वविद्यालय क कुलपति एहि काज लेल तत्पर लागि रहल छथि। पिछला मास ओ नरगौना महल क ठीक सामनेवाला पार्क में पदाधिकारी सब लेल आवास निर्माण शुरू करा देलथि। एहि ठाम आवास बनला स महल झंपा जाएत। दोसर जे धरोहर घोषित भ चुकल आनंदबाग पैलेस कए सेहो एहि निर्माण स पर्यावरण संबंधी दिक्कत होएत। एहि सब कए नजरअंदाज करैत एहि फागुन मास मे भांग पी विवि प्रशासन लगातार परिसर संग बलात्कार करबा मे लागल अछि। प्रशासन क ताजा फैसला सेहो कम चौकेबा योग्य नहि अछि। विवि प्रशासन आब मनोकामना मंदिर क सामने पार्क वाला जगह पर भवन बनेबाक फैसला ल लेलक अछि। विवि प्रशासन पहिने धरोहर कए खंडहर बना चुकल अछि आब परिसर कए सेहो बदरंग बनेबा मे जुटि गेल अछि। कमाल इ अछि जे इ सब काज कोनो नेता या मूर्ख लोक नहि क रहल अछि, बल्कि अपना कए पढल लिखल विद्वान कहनिहार लोकक छी। इ सब बीमार परिसर कए मौत क मुंह मे देबा लेल अपना कए चिकित्सक कहनिहार कुलपति संग बैसार करि इ निर्णय लेलथि अछि। एहि संबंध मे विवि प्रशासन क कहब अछि जे यूजीसी स प्राप्त राशि खर्च करबाक अछि ताहि लेल आडिटोरियम क निर्माण जरूरी छल। एहि आडिटोरियम मे पांच सौ लोकक एक संग बैसबाक सुविधा होएत। एकरा लेल विवि परिसर मे मनोकामना मंदिर क दक्षिणी खाली जगह कए चयन कैल गेल अछि। प्रशासनक दावा अछि जे नौ मास क भीतर एकर निर्माण कार्य करि लेल जाएत। कुलानुशासक सह प्रभारी कुलसचिव डॉ. टीएन झा कहला अछि जे आडिटोरियम निर्माण क आवश्यकता बहुत दिन स छल आ आब इ समस्या खत्म भ जाएत, मुदा ओ एहि पर किछु नहि कहला जे परिसर आ पर्यावरण कए एहि प्रकारक बेतरकीब निर्माण स कोना नहि क्षति होएत। कुलपति डॉ. एसपी सिंह क अध्यक्षता मे भेल एहि बैसार मे रसायन विभागाध्यक्ष शशिरंजन कुमार, आईएन मिश्र, विकास पदाधिकारी डॉ. धु्रव कुमार, वित्तीय परामर्शी सीआर दिगवाल, वित्त पदाधिकारी अशोक कुमार कर्ण, अभियंता एनएल झा मौजूद छलाह, मुदा कियो परिसर क हित लेल नहि सोचलक सबहक ध्यान यूजीसीक टका आ अपना लेल बनि रहल भवन आ आवास पर केंद्रित रहल।
Mithila University ke 60 acre bhumi ya t kiraya per achi ya faltu paral achi jena Raj astwal ke vishal prangan,Purna Bus stand ke birhat prangan,Madheswar or motimahalke bich me awasthit bhubhag,sotiline ke bagal me jahi me Bhara per Navoday vidyalay chal,etc eker babjud ek sunder, manoram parishar ke barbad karwak kutark d rahal achi university.