दोसरसमाचार
अगस्त मे बाढ़ जुडत ग्रीड स, मार्च 14 स देत बरौनी बिजली
पटना । उत्तर बिहार आ खास क मिथिला क्षेत्र लेल सुखद समाद। विद्युत कंपनी आ एनटीपीसी क संयुक्त उपक्रम कांटी बिजली उत्पादन निगम लिमिटेड क 110 मेगावाट क इकाई स बुधदिन 60 मेगावाट बिजली क उत्पादन भेल। एक सप्ताह मे एहि ठाम स 90 स 100 मेगावाट बिजली उत्पादन हुए लागत। कांटी थर्मल पावर क दोसर 110 मेगावाट क इकाई स दिसंबर तक उत्पादन शुरू हेबाक संभावना अछि। कांटी बिजली उत्पादन निगम मे 390 मेगावाट (1952) क इकाई लगेबाक प्रक्रिया शुरू भ गेल अछि आ 500 मेगावाट क एकटा इकाई लगेबाक प्रस्ताव पर काज चलि रहल अछि। उत्पादन खर्च मे वृद्धि भेलाक कारण स कांटी स 2003 मे बिजली उत्पादन बंद क देल गेल छल। फेर जनवरी 2008 मे एकटा इकाई स उत्पादन शुरू भेल आ नवंबर 2011 मे जीर्णोद्धार क नाम पर बंद क देल गेल। एक वर्ष विलंब स बिजली उत्पादन शुरू कैल गेल अछि। एनटीपीसी क बाढ़ थर्मल पावर क इकाई संख्या चार स दिसंबर 2013 तक बिजली उत्पादन शुरू भ जाएत। 660 मेगावाट क एहि इकाई मे बिहार क हिस्सेदारी 50 प्रतिशत अछि। ओकर छह मास बाद दोसर इकाई स उत्पादन शुरू होएत। बाढ़ थर्मल पावर अगस्त माह क अंत तक ग्रिड स जुड़ल जाएत। कमर्शियल उत्पादन दिसंबर स होएत। अगस्त क बाद एहि ठाम स बिजली उत्पादन क शुरूआत भ जाएत। बरौनी थर्मल पावर 220 मेगावाट 2014 क मध्य तक उत्पादन शुरू क देत। एहि ठाम 500 मेगावाट (2502) क नव इकाई लगेबाक प्रक्रिया चलि रहल अछि। जापान सेहो एहि ठाम 250 मेगावाट क एकटा इकाई लगेबा लेल तैयार अछि। 2014 क मध्य स 1010 मेगावाट बिजली मार्केट स भेटत। एहि संबंध मे समझौता भ चुकल अछि। केन्द्रीय सेक्टर मे बिहार क हिस्सेदारी 2034 मेगावाट भ गेल अछि। राज्य सरकार क प्रयास अछि जे 2015 तक कम स कम चारि हजार मेगावाट बिजली राज्य मे आपूर्ति हो। चौसा मे सतजल जल निगम 1320 मेगावाट क उत्पादन केन्द्र लगा रहल अछि। पीरपैती आ कजरा मे बिजली उत्पादन केन्द्र लगेबा लेल एजेंसी तय करबाक प्रक्रिया चलि रहल अछि। एकर संगहि नवीनगर मे बिजली उत्पादन केन्द्र लगेबाक काज चलि रहल अछि।
इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bhagalpur, bihar news, darbhanga, Hawai seva, latest bihar news, latest maithili news, latest mithila news, maithili news, maithili newspaper, mithila news, patna, saharsa
