दोसरसमाचार
भारतेंदु दास
मुंबई । जहां धरि बिहार क गौरव क गप अछि त एहि मे 103 साल नहि बल्कि एहि धरती क प्राचीन गौरव क सेहो गप हेबाक चाही, मुदा जखन हम बिहार क 103म वर्षगांठ मना रहल छी त वर्तमान राज्य क निर्माणक बाद क उपलब्धि पर चर्चा करब चाहब। हम सब जनैत छी जे 1912 मे बिहार राज्य क निर्माण बंगाल स अलग भ क भेल। बिहार अपन निर्माण क पचास साल पहिने क समय मे दूटा भयंकर अकाल क सामना केलक आ देश क आजादी क किछु समय पहिने सेहो एहने भयंकर अकाल कए झेललक। सब बेर एहि अकाल मे लाख स बेसी लोक मरैत रहल । मुदा बिहार क इ उपलब्धि कहल जाये जे बिना केन्द्र स बेसी मदद भेटने बिहार क किसान आ एहि ठामक सरकार अपन सीमित संसाधन आ व्यवस्था मे आमूल चूल सुधार केलक, जाहि स फेर कहियो हमरा सब कए ओहन स्थिति नहि देखबा लेल भेटल । बिहार क राजनयिक आजादी क बाद सम्पूर्ण देश क राजनीति कए नव दिशा देलथि । कॉग्रेस क खानदानी राजनीति क अश्वमेध घोडा कए एकटा बिहारी नेता क नेतृत्व मे 1977 मे रोकल गेल । जेकर नतीजा आजुक दिन कॉग्रेस क ध्वस्त होइत स्थिति मे देखल जा सकैत छी । कला क्षेत्र मे बिहार क निर्माणक उपरांत एकर अलग पहचान भेटल । मिथिला चित्रकला एकटा विश्व स्तरीय लोक कला क ब्रांड मे स्थापित भेल, इ एहि ठाक क लोक कलाकार क अद्वितीय प्रतिभा क द्योतक अछि । एहिना देखल जाये त पिछला 10 साल मे केन्द्र क गहीर भेदभावपूर्ण रवैया क बावजूद बिहार देश मे सब राज्य स बेहतर विकास दर हासिल केलक अछि । इ गप बिहार मे उपलब्ध असीम सम्भावना कए देखा रहल अछि । बिहार मे लोकक आत्मबल आन राज्य क मुकाबले बहुत मजबूत अछि। बिहार क गरीब किसान खेती मे नुकसान भेला पर कहियो महाराष्ट्र जेकां आत्महत्या नहि केलक अछि आ नहि बंगाल जेकां राशन क दुकाने लूटैत अछि । इ हिम्मत नहि हारनिहार लोग अछि बल्कि वैकल्पिक उपाय तकबाक माद्दा रखैत अछि। देश क कोन कोन मे जाकए अपन मजबूत देह आ इरादा स अपन, परिवार आ राज्य क विकास करैत अछि। हमरा बिहार पर गर्व अछि । साहित्य क क्षेत्र मे सेहो बंगाल स अलग पहचान बनेबा मे बिहार सफल रहल अछि । बिहार क साहित्यकार हिन्दी साहित्य कए नव उर्जा आ दिशा प्रदान केलथि । नागार्जुन सन विद्रोही जमीनी कवि बिहार देलक, दिनकर सन देदिप्यमान वीर रस क कवि देलक, रेणु सन उपन्यासकार सेहो बिहार देलक । बिहार लग युवा साहित्यककार क सेहो बेस लंबा सूची अछि । सामाजिक सरोकर कए उद्यम स जोडबा क जे मॉडेल बिन्देश्वर पाठक देलथि, ओ पूरा विश्व मे अनुकरणीय अछि । एतबे नहि बिहार क विद्यार्थी आ युवा देश क सब प्रदेश आ सब जिला मे प्रशासनिक क्षमता क परिचय देलथि आ ब्रांड बिहार कए प्रज्वलित केलथि अछि । एहन मे इ कहबा मे संकोच नहि जे 103 साल पुरान बिहार मे गर्व करबा लेल बहुत रास बिंदू अछि आ बिहार अपना आप मे एकटा ब्रांड बनि चुकल अछि।
इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bhagalpur, bihar news, darbhanga, latest bihar news, latest maithili news, latest mithila news, maithili news, maithili newspaper, mithila news, patna, saharsa
Bari neek lakhla he