दोसरसमाचार
भागलपुर। भागलपुर क सांसद सह भाजपा क राष्ट्रीय प्रवक्ता सैयद शाहनवाज हुसैन कहला अछि जे ठेकेदारी करब सांसद क काज नहि अछि। सरकार स टका आनब आ क्षेत्रक गप सरकार त पहुंचायब हमर काज छी जे हम क रहल छी।
मो हुसैन कहला जे सांसद क रूप मे हमर जेतबा काज छल हम केलहुं अछि, आ एकर श्रेय हमरा देबा लेल किछु लोक तैयार नहि छथि, ओ देरी क आधार पर एकर श्रेय अपन नाम करबा लेल धरना द रहल छथि। मुदा हम अपन दायित्व बुझैत छी। सड़क निर्माण कार्य मे विलंब लेल हम पथ निर्माण मंत्री नंद किशोर यादव स गप करब। हमर काज टेंडर करेबाक छल। पहिने टेंडर भेल, मुदा काज नहि शुरू भ सकल। ठेकेदार नहि भेटल। ओ आक्रोश व्यक्त करैत कहला जे सांसद आब एहि लेल ठेकेदारी त नहि करत। ठेकेदार ताकब हमर नहि इंजीनियर क काज अछि। मो हुसैन कहला जे जन समस्या लेल आंदोलन हेबाक चाही मुदा टेंडर भेलाक बाद आंदोलन अनुचित अछि। एहि प्रकार स लोक क ऊर्जा क गलत उपयोग होइत अछि। एहि स ककरो फायदा नहि होएत। ओ कहला जे एनएच 80 क निर्माण लेल हम इंजीनियर आ ठेकेदार सब स गप केलहुं अछि। निर्माण कार्य पटरी पर आबि गेल अछि।
पत्रकार संग गप करैत ओ कहला जे अहां सब निश्चिंत रहू जा धरि एनएच 80 क गड्ढा नहि भरल जाएत हम दिल्ली नहि जा रहल छी। सांसद कहला जे अगर विकास कार्य मे कोनो प्रकार क बाधा देखाइत अछि त किछु लोक सीधा सांसद कए गरिया दैत अछि, मुदा जखन कोनो काज मंजूर होइत अछि त किछु लोक बिना कोनो तुक कए श्रेय लेबा लेल धरना आयोजित क अपन श्रेय लेल प्रयासरत भ जाइत छथि। इ नीक गप नहि।
ओ कहला जे विकास हुनक प्राथमिकी सूची मे हरदम रहल अछि। रेलवे स्टेशन स बाबूपुर मोड़ लेल 12 करोड़ सात लाख 24 हजार टका क प्राक्लन पास भेल अछि। आब इ काज शुरू भ जाएत।
सांसद कहला जे 232 करोड़ 44 लाख क लागत स बायपास निर्माण कार्य करेबाक अछि, प्रक्रिया चलि रहल अछि। आब केवल मंत्री क सहमति क बाट ताकल जा रहल अछि। बिहपुर स फुलौत क बीच (एनएच 106) क निर्माण कार्य जारी अछि। नदी मे डीप बोरिंग लेल राजस्थान क (कंपनी) आइआइटी रुढ.की नदी मे डीप बोरिंग क काज क रहल अछि। पाइलिंग भेलाक बाद काज कए गति भेटत। मो हुसैन कहला जे इ हमरा सब लेल पैघ उपलब्धि होएत। ओ उदास भ मे कहला जे जखन काज भ रहल अछि तखन केवल देरी क नाम पर हमर आलोचना आ आंदोलन नहि हेबाक चाही। सांसद कहला जे किछु काज क गति कम अछि आ एकर चिंता हुनको अछि। ओ कहला जे चंपा नदी पर पुल निर्माण क काज बहुत धीमा गति स भ रहल अछि। इ काज युद्ध स्तर पर हेबाक चाहैत छल।
मो हुसैन कहला जे ओ भागलपुर क विकास लेल सब मोरचा पर प्रयास क रहल छथि। एकर प्रमाण अछि जे आब डीआरएम कार्यालय भागलपुर मे बनत। रेल मंत्री पवन बंसल एकरा पर सहमति द देलथि अछि। सांसद मो हुसैन कहला जे डीआरएम कार्यालय पर ओ दू बेर मंत्री स भेंट केलथि आ रेलवे बोर्ड संग बैसार केलथि। जीएम आ डीआरएम सन अधिकारी कए एहि संबंध मे कहल जा चुकल अछि। रेल बजट मे इ सपना साकार होएत। ओ कहला जे तत्कालीन रेल मंत्री ममता बनर्जी कहने छलीह जे अगर शाहनवाज जमीन उपलब्ध करा दथि त भागलपुर मे डीआरएम कार्यालय बनत। हम पूर्व मे तत्कालीन डीआरएम एमके माथुर कए जगदीशपुर मे 80 एकड़ जमीन देखा देने रही। रेलवे क जमीन कचहरी, बरारी, सुल्तानगंज आदि जगह पर सेहो अछि। ओ कहला जे इच्छा शक्ति क बिना कोनो काज संपन्न नहि भ सकैत अछि। डीआरएम कार्यालय एकटा सपना छल जे पूरा भ रहल अछि।
भागलपुर एयरपोर्ट क संबंध मे सांसद कहला जे हवाई पट्टी निर्माण आ एप्रोच पथ क निर्माण काज लेल एक करोड़ 33 लाख टका मंजूर कैल गेल अछि। एकरा लेल 50 लाख टका क आवंटन सेहो भ चुकल अछि।
maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna, दरभंगा, मिथिला, मिथिला समाचार, मैथिली समाचार, बिहार, मिथिला समाद, इ-समाद, इपेपर
