दोसरसमाचार
पटना । के कहैत अछि जे सपना सच नहि होइत अछि। पिछला पांच दशक स बिहारक लोकक आंखि मे हेलैत सपना आइ आखिरकार साकार भ गेल। मुंबई क तर्ज पर पटना कए सेहो अपन मैरीन ड्राइव होएत। फर्क इ रहत जे मुंबई मे मैरीन ड्राइव समुद्र क कैछर मे बनल अछि आ पटना मे इ गंगा क कछैर मे बनत। चारि लेन क हाई स्पीड सड़क कए लोक नायक गंगा पथ क नाम देल गेल अछि। इसमाद तहिये एहि परियोजना कए जमीन पर उतरबाक प्रति विश्वास जता चुकल छल जहिया एकर जिम्मेदारी राज्यक रत्न नौकरशाह प्रत्यय अमृत कए देल गेल छल। मुख्यमंत्री नीतीश कुमार शुक्रदिन लोकनायक जयप्रकाश नारायण क जन्मदिवस क अवसर पर एकर कार्यारंभ केलथि। पटना क दीघा स दीदारगंज तक करीब 21.5 किलोमीटर सड़क क निर्माण क काज शुरू भ गेल। 2007 स महा प्रोजेक्ट पर नीतीश सरकार काज क रहल अछि, पहिने एकरा पी पी मोड क तहत बनेबाक विचार छल मुदा कोनो कंपनी इच्छा प्रकट नहि केलक एकर बाद मुख्यमंत्री नीतीश कुमार एकरा राज्य सरकार क बल बूते बनेबाक फैसला केलथि। एहि प्रोजेक्ट मे 2000 करोड़ क लोन हुडको स लेल गेल अछि आ बाकी 1160 करोड़ राज्य सरकार लगा रहल अछि। इ प्रोजेक्ट 4 साल मे पूरा होएत। एकरा आंध्र प्रदेश क कंपनी नवयुगा निर्माण बना रहल अछि। एहि फोरलेन सड़क पर गाडी सरपट दौडत संगहि मॉर्निंग वॉक पाथक अलग स सुविधा रहत। हाई स्पीड कॉरिडोर मे ट्रैफिक क प्रवाह नहि रुकए एहि लेल सड़क क कात मे बस-वे, सब-वे ओवर ब्रिज क निर्माण कैल जाएत। एतबे नहि इ गंगा पथ एक तरह स पटना क रिंग रोड क काज करत जे पांचटा नेशनल हाईवे जुड़ल रहत। मुख्यमंत्री नीतीश कुमार क इ ड्रीम प्रोजेक्ट अछि आओर बिहारक एखन धरिक इ सबस पैघ परियोजना अछि। एहि मे केवल सड़क क निर्माण नहि बल्कि एहि पूरा क्षेत्र क सौंदर्यकरण क संग संग पर्यावरण क सेहो पूरा ख्याल राखल जाएत। एहि ठाम आपातकाल टेलिफोन आ विश्वस्तरिय कैफेटेरिया सेहो रहत ताकि लोक कए यात्रा क संग-संग पर्यटन क सेहो आनंद भेट सकत। लोकनायक गंगा पथ बिन गेला स दीघा स दीदारगंज जेबाक मे जे एखन 2 घंटा लगैत अछि ओ दूरी 20 मिनट भ जाएत। मुख्यमंत्री कहला जे अगर इ योजना सफल रहल त एकरा कच्ची दरगाह आ बख्तियारपुर लग गंगा पर बनि रहल पुल स सेहो भविष्य मे जोडल जाएत। दीघा सेतु स दीदारगंज तक गंगा पथ क लम्बाई 21.5 किलोमीटर अछि, जाहि मे स 7.5 किलोमीटर सड़क एलिवेटर होएत। गंगा पथ स शहर कए जोड़बा लेल पांचटा अंडर पास होएत। बहरहाल अगर इ प्रोजेक्ट समय पर तैयार भ जाइत अछि त नीतीश सरकार लेल एकटा पैघ उपलब्धि होएत।
इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bhagalpur, bihar news, darbhanga, Hawai seva, latest bihar news, latest maithili news, latest mithila news, maithili news, maithili newspaper, mithila news, patna, saharsa
