दोसरसमाचार
दरभंगा। दरभंगा क लक्ष्मीविलास पैलेस सरोवर क सौंदर्यीकरणक शिलान्यास आब तीन दिसंबर कए होएत, पहिने इ एक दिसंबर कए निर्धारित छल, मुदा पूर्व प्रधानमंत्री गुजराल क निधन क बाद राजकीय शोक घोषित भेला स इ कार्यक्रम कए आगू बढा देल गेल अछि।ज्ञात हुए जे राज्य क सरकार पर्यटनक दृष्टि स कामेश्वर नगर क विकास करबाक दिशा मे एकटा आर डेग बढेलक अछि। तीन दिसंबर कए कामेश्वर सिंह दरभंगा संस्कृत विश्वविद्यालय मुख्यालय स सटल पश्चिम स्थित सरोवर शुक्खी दिग्घी आ कामेश्वर नगर स्थित राज परिवारक श्मशान स्थल माधेश्वर परिसर क विकास आ सौंदर्यीकरण क शिलान्यास होएत। राज्यक पर्यटन मंत्री सुनील कुमार पिंटू दिनक करीब 2 बजे एहि दूनू परियोजनाक शिलान्यास करताह। एहि अवसर पर पीएचडी मंत्री चंद्रमोहन राय आ ग्रामीण विकास मंत्री नीतिश मिश्र सेहो उपस्थित रहताह। कार्यक्रम क अध्यक्षता नगर विधायक संजय सरावगी करताह। कार्यक्रम में विधानपार्षद विनोद चौधरी, दरभंगा क मेयर गौरी पासवान आ कामेश्वरसिंह संस्कृत विश्वविद्यालयक कुलपति अरविंद पांडेय सेहो मौजूद रहताह।
पर्यटन विभाग 6 करोड़ 66 लाख पांच हजार टका स कामेश्वर नगर स्थित राज परिवारक श्मशान स्थल माधेश्वर परिसर क विकास आ सौंदर्यीकरण संगहि एक करोड़ 64 लाख 87 हजार 900 टका स कामेश्वर सिंह दरभंगा संस्कृत विश्वविद्यालय मुख्यालय स सटल पश्चिम स्थित सरोवर शुक्खी दिग्घी क सेहो क विकास आ सौंदर्यीकरण क योजना तैयार केलक अछि। इ काज अगिला एक साल क अंतर पूरा करि लेल जाएत। दरभंगा क विधायक संजय सरावगी एहि संबंध मे विस्तार स जानकारी दैत कहला जे कामेश्वर नगर क विकास लेल ओ सतत प्रयत्नशील छथि। श्री सरावगी कहला जे एकरा दरभंगा शहर कए पर्यटन क मानचित्र पर अनबाक पैघ पहल कहल जा सकैत अछि। एकरा लेल ओ मुख्यमंत्री नीतीश कुमार, उप मुख्यमंत्री सुशील कुमार मोदी आ पर्यटन मंत्री सुनील कुमार पिंटू क प्रति आभार प्रकट केलथि।
कामेश्वर सिंह दरभंगा संस्कृत विश्वविद्यालय मुख्यालय स सटल पश्चिम स्थित सरोवर शुक्खी दिग्घी क विकास आ सौंदर्यीकरण क संबंध मे जानकारी दैत श्री सरावगी कहला जे एहि राशि स सरोवर क आसपास प्रकाश क व्यवस्था संगहि कछैर मे फुटपाथ क निर्माण, लैंडस्केपिंग, जेटी, मोटर वोट, पैडल वोट आदि क व्यवस्था होएत। श्री सरावगी कहला जे सौंदर्यीकरण क डिजाइन तैयार करबा काल एहि गप क खास तौर पर ध्यान राखल गेल अछि जे एकर वास्तुशैली राज परिसरक पुरान वास्तुशैली स मिलैत-जुलैत देखबा मे लागै। ओ कहला जे इ परियोजना कए पूरा भेला क बाद परिसर एक बेर फेर सुंदर आ व्यवस्थित लागत।
श्री सरावगी कहला जे माधेश्वर परिसर लेल राशि दू चरण मे देल जाएत। पहिल बेर 4,53,56,500 टका ओ दोसर बेर 2,12,48,500 टका क काज होएत। प्रथम चरण लेल स्वीकृत कैल गेल राशि मे स तत्काल 3,59,70,700 टकाक निकासी आ व्यय क स्वीकृति सेहो भेट गेल अछि। ज्ञात हुए जे एहि परिसर मे राज परिवारक कईटा चिता पर भव्य मंदिर बनल अछि। सबस पुरान मंदिर महाराजा रुद्र सिंह क चिता पर अछि जखन कि सबस नव मंदिर महाराजा कामेश्वर सिंह क चिता पर बनल अछि। ओना एहि परिसर मे सबस बेसी भीड महाराजा रामेश्वर सिंह क चिता पर बनल रामेश्वरी श्यामा मंदिर मे रहैत अछि। ओ कहला जे चौरंगीक विकास लेल सेहो योजना तैयार अछि।
एकर संगहि दूटा महत्वपूर्ण तथ्य पर गौर जरूर कैल जाए पहिल इ जे सौंदर्यीकरणक नाम पर महाराज शक्र सिंह द्वारा खोदाउल गेल पोखरी क आकार संग छोडछाड नहि कैल जाए, दोसर इ जे माधेश्वर परिसर मे बहुत एहन चिता अछि जाहि पर एखन धरि मंदिरक निर्माण नहि भ सकल अछि। सौंदर्यीकरणक नाम पर एहन चिता सब कए नष्ट नहि कैल जाए। ओकर सबहक संरक्षण क जरूरत अछि किया त ओ राज परिवार क धरोहर आ भावनात्मक महत्वक स्थल छी।
maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna
Etek vistaar sa jankari debak lel dhanyabaad.