दोसरसमाचार
हे मातृभूमि स्वीकारू प्रणाम
हम आयल छी आइ अपन गाम
जाहि गाम स कुल छल उपटि गेल
ओहि गाम स हम जोडब आइ नाम
आंखि स टपकल हमर इ नोर
कहू की सटल अछि हमर ढोर
सिहरल तन पुलकित मन हमर
चाही स्नेह अहां स हमरा दान
हे मातृभूमि स्वीकारू प्रणाम
हम आयल छी आइ अपन गाम
आशीष झा
पटना। पुनपुन प्रखंड क वाजितपुर गाम मे आइ भोर एकटा नव इजोत संग भेल। करीब पच्चीस हजार लोक एहि जार मे भोर ग्यारह बजे मैदान मे जमा भ गेल छलथि। अपन गाम क ओहि कुल वंश कए अभिनंदन लेल जे 25 साल स अपन जमीन ताकि रहल छल। मॉरीशस क राष्ट्रपति राजकेश्वर प्रयाग क 25 साल लंबा खोज क आइ आइ सुखद अंत भेल। लोक क प्रेम देख राष्ट्रपति सेहो अपना कए भावुक हेबा स नहि रोकि सकलाह। भावुकता मे हुनकर आंखि क नोर पिपनीक बांध तोडि देलक। इ बांध टूटबाक छल किया त पच्चीस साल क मशक्कत क बाद ओ अपन मूल गाम क पता पर पहुंचल छलाह। डेढ़ सौ वर्ष पहिने वाजितपुर गाम स हुनकर परदादा मॉरीशस गेल छलाह। राजकेश्वर प्रयाग गाम मे जुटल लोक कए हिंदी मे संबोधित केलथि, जाहि स भावना और प्रखर भ सामने आयल। ओ अपन संबोधन क शुरुआत करैत कहला जे हम एहि धरती कए प्रणाम करैत छी। जहिना हम एहि गाम मे प्रवेश केलहुं हमर आंखि नोरा गेल, हम भावुक भ गेलहुं।
महामहिम प्रयाग अपराह्न लगभग तीन बजे मुख्यमंत्री नीतीश कुमार संग मंच पर एलाह। संग मे राष्ट्रपति क कनिया अनिता प्रयाग सेहो रहथि। मैदान मे हुनक बाट तकैत लोक हुनकर स्वागत मे थपडी बजेलक। प्रयाग कहला जे मॉरीशस आ बिहार क संबंध देश दू देशक नहि, बल्कि दूटा भाई क अछि। हमर पुरखा बिहार स अपन शरीर मॉरीशस ल गेल छलाह, हुनक आत्मा एहि ठाम बसैत अछि। राजकेश्वर प्रयाग अपन गाम क लोक स अपील केलथि जे ओ अपन बच्चा कए नीक शिक्षा दथि किया त शिक्षा गाम क दुख दर्द कए खत्म क सकैत अछि। एहि अवसर पर राजकेश्वर प्रयाग वाजितपुर गाम मे एकटा हाई स्कूल क शिलान्यास सेहो केलथि। ओ कहला जे जाति-पांत बहुत भेल आब एकरा छोडि कए बिहार कए आगू बढेबा मे हमरा सब कए लगबाक चाही। बिहार क विकास क चर्चा करैत प्रयाग कहला जे एकर खूब चर्चा श्रा रहल अछि। बिहार सरकार कए गाम तकबा मे मदद करबा लेल धन्यवाद दैत कहला जे हम आभारी छी मुख्यमंत्री नीतीश कुमार क जे हमरा हमर पूर्वज क माटी तक पहुंचा देलथि। परदादा क भूमि पर हमर डेग राखब हमरा लेल सपना जेकां अछि। इ सर्वाधिक खुशी क समय छी।
एहि मौका पर मुख्यमंत्री कहला जे इ पैघ गप अछि जे मॉरीशस क राष्ट्रपति अपन गाम एलाह अछि। अपन मूल कए याद राखब पैघ गप अछि। बिहार क लोक जतए छथि अपन पुरुषार्थ स कमाल केने छथि। मुख्यमंत्री कहला जे बिहार लोक भीख मांगबा लेल कतहु नहि जाइत अछि। बिहारी जतए जाइत अछि ओकर योगदान ओहि ठामक विकास मे रहैत अछि।
maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna, दरभंगा, मिथिला, मिथिला समाचार, मैथिली समाचार, बिहार, मिथिला समाद, इ-समाद, इपेपर
