दोसरसमाचार
पटना । मिथिला क्षेत्र एक बेर फेर स औद्योगिक रूप स समृद्ध क्षेत्र क श्रेणी मे चिन्हल जाएत। एकरा लेल राज्य सरकार हर प्रकार क संभावना पर मंथन क रहल अछि। सरकार राज्य मे सातटा नव औद्योगिक पार्क स्थापित करबाक निर्णय लेलक अछि, जाहि मे तीनटा मिथिला क्षेत्र मे बनत। एकर जानकारी उद्योग मंत्री रेणु कुशवाहा कहलथि जे नव पार्क नालंदा, भागलपुर, बक्सर, लखीसराय, बांका, मधेपुरा और बेगूसराय मे बनत।
ओ कहलथि जे बेहतर कानून व्यवस्था आ मजदूर एहि क्षेत्र क सबस पैघ पूंजी रहल अछि। आब आधारभूत संरचना सेहो मजबूत भ चुकल अछि। अगिला दू साल मे बिजली क समस्या क निराकरण सेहो भ जाएत, एहन मे निवेश लेल सबस पैघ बाधा जमीन अछि, जेकर निराकरण लेल सरकार मंथन शुरू क देलक अछि। उद्योग मंत्री कहलथि जे उद्योग क स्थापना लेल जमीन महत्वपूर्ण घटक अछि। आइ पैघ पैघ उद्योगपति बिहार मे पूंजी निवेश करबा लेल रुचि ल रहल छथि। सरकार सेहो निवेशक कए हर संभव सुविधा देबा लेल तैयार अछि। जमीन उपलब्ध नहि रहबा स कई बेर उद्योग स्थापित नहि होइत अछि। एहि लेल राज्य सरकार निवेशक क सुविधा लेल राज्य मे सातटा नव औद्योगिक पार्क क स्थापना क निर्णय लेलक अछि। एहि लेल नालंदा, भागलपुर, बक्सर, लखीसराय, बांका, मधेपुरा और बेगूसराय मे 4,550 एकड़ जमीन क अधिग्रहण कैल जाएत। उद्योग मंत्री कहलथि जे ओ मिथिला क्षेत्र मे अधिकतर जमीन खेतिहर अछि, एहन मे उद्योग लेल एहि क्षेत्र मे जमीन क उपलब्धता मुश्किल रहैत अछि। ओना ओ कहलथि जे जमीन लेल किसान स गप करतथि आ औद्योगिक पार्क लेल भूमि उपलब्ध करेबा लेल आग्रह करतथि। ओ कहलथि जे हुनका उम्मीद अछि जे एहि क्षेत्र सब मे अगिला किछु साल मे औद्योगिक पार्क क स्थापना क लेल जाएत। ओ कहलथि जे ओना सरकार लग सेहो किछु जमीन अछि, जेकरा एहि पार्क क हिस्सा बनाउल जाएत। वर्ष 2012-13 मे बियाडा (बिहार औद्योगिक क्षेत्र विकास प्राधिकरण) 511 एकड़ जमीन क अधिग्रहण केने छल। एहि मे स 200 एकड़ जमीन 336 इकाइ लेल आवंटित कैल गेल अछि। मंत्री कहलथि जे एहन जे भूमि आवंटित कैल गेल अछि ओहि मे अधिकतर निवेशक निर्माण काज शुरू क चुकल छथि। किछु छोट इकाइ मे त उत्पादन शुरू भ रहल अछि। ओ दावा केलथि जे जमीन उपलब्ध भेलाक बाद निवेश क कमी नहि रहत, ओना एखनो सूची लंबा अछि जे बिहार मे निवेश लेल तैयार छथि। मुदा, निवेशक क पहिल इच्छा पटना मे जमीनक होइत अछि जे सरकार लेल उपलब्ध करा देब संभव नहि अछि। मंत्री कहलथि जे उद्योग विभाग क महत्वाकांक्षी मेगा औद्योगिक क्षेत्र सेहो अगिला वित्त वर्ष मे तैयार भ जाएत। ओ कहलथि जे बिहटा मे 350 एकड़ भूमि मे औद्योगिक पार्क विकसित कैल जा रहल अछि। एहि ठाम हीरो साइकिल आ रेमंड्स सहित किछु पैघ कंपनी अपन इकाइ क स्थापना क रहल अछि। मंत्री कहलथि जे सरकार राज्य क हर हिस्सा मे छोट औद्योगिक क्षेत्र क स्थापना करबा मे लागल अछि। एहि लेल उद्योग विभाग सबटा जिला मजिस्ट्रेट कए पत्र लिखलक अछि।
इ-समाद, इपेपर, दरभंगा, बिहार, मिथिला, मिथिला समाचार, मिथिला समाद, मैथिली समाचार, bihar news, darbhanga, latest bihar news, latest maithili news, latest mithila news, maithili news, maithili newspaper, mithila news, patna, saharsa
