दोसरसमाचार
मधुबनी। केन्द्रीय गृह सचिव राजकुमार सिंह कहला अछि जे मिथिला क लोग कोनो हाल मे आतंकी कए संरक्षण नहि द सकैत छथि। एहन कोनो आरोप एहि समाज पर नहि लगाउल जा सकैत अछि। आतंकी लेल सहानुभूति एहि ठामक लोक मे भेनाई संभव नहि अछि। ओ कहला जे इ आरोप ओहने लोक लगा सकैत अछि जेकरा मिथिलाक संबंध मे कोनो जानकारी नहि अछि। हाल मे भेल फसीह महमुद क गिरफ्तारी पर पूछल गेल सवालक संदर्भ मे किछु कहबा स बचैत श्री सिंह कहला जे आतंकवादी गतिविधि मे शामिल कोनो व्यक्ति कए कतहु स गिरफ्तारी भ सकैत अछि,मुदा गिरफ्तारी स पूर्व या फेर गिरफ्तारी क बाद ओहि ठाम क स्थानीय पुलिस स्टेशन कए एकर सूचना देब अनिवार्य अछि। अहां सब जे जानकारी द रहल छी अगर ओ सच अछि त एकर पूनरावृत्ति भविष्य मे नहि होएत।
दू दिवसीय यात्रा पर अपन मातृक आयल श्री सिंह कहला जे भारत-नेपाल सीमा स सटल गामक क लोक कहियो नहि चाहत जे सीमावर्ती क्षेत्र क माहौल बिगडै। एहि उद्देश्य स भारत-नेपाल सीमा पर सीमा सुरक्षा बलक तैनाती कैल गेल अछि। सबटा बीओपी कए निर्देश देल गेल अछि जे ओ गामक लोक संग समन्वय बनाकए शांति क संग-संग रचनात्मक कार्य सेहो करै ताकि लोक क विश्वास बढए। ओ कहला जे हमर सूचना तंत्र काफी मजबूत अछि। हमरा कियो हिला नहि सकैत अछि। सीमा पर हमर नजरि अछि। सरकार कए सीमा क हर गतिविधि क जानकारी अछि। हम कोनो हाल मे सीमावर्ती क्षेत्र क स्थिति बिगड़ए नहि देब। ओ नेपाल क वर्तमान स्थिति पर चिंता व्यक्त करैत कहला जे भारत चाहैत अछि जे ओहि ठाम शांति आ अमनचैन क माहौल कायम हुए। एकरा लेल ओहि ठाम सबटा राजनीतिक दल कए मिलकए जनतांत्रिक तरीका स स्थाई सरकार बनेबाक पहल करबाक चाहि।
श्री सिंह सीमा पर अवस्थित बीओपी क काजक चर्चा करैत कहला जे दूनू देश क बीच मधुर संबंध बनेबाक प्रयास एसएसबी जवान द्वारा कैल जा रहल अछि, मुदा एकरा आओर सशक्त बनेबा क जरूरत अछि। एहि दिशा मे प्रयास जारी अछि। श्री सिंह कहला जे टोल पर बीओपी कैंप स्थापित नहि कैल जाएत, जतए टोल लग कैंप अछि ओतए स ओकरा हटा लेल जाएत।
ओ युवा सब स आह्वान करैत कहला जे एसएसबी जवान क भर्ती होएत। अहां सब मेहनत करू आ 30 प्रतिशत बोर्डर डिस्ट्रिक्ट क लाभ उठाउ। निकट भविष्य मे आठ हजार स बेसी एसएसबी जवान क बहाली होएत। एहिमे तीस प्रतिशत सीट बॉर्डर जिला लेल सुरक्षित अछि। एकर लाभ मधुबनी क युवक कए भेट सकैत अछि।
सेना क हेलीकाप्टर स मधुबनी हवाई अड्डा पहुंचल श्री सिंह अपन मातृक शंभुआड़ मे ग्रामीण द्वारा निर्मित सड़क आ भानुप्रताप वर्मा क्रीड़ा मैदान क उद्घाटनोपरांत उपस्थित जनसमुह कए सेहो संबोधित केलाह। ओ कहला जे एहि क्षेत्र क विकास लेल हर संभव प्रयास करब। ओ कहला जे एहि ठामक लोक आ संस्कृति अन्य प्रांत स बेहतर अछि। एहि ठाम प्रतिभा प्रकृति प्रदत अछि जे कतहु आओर नहि देखबा लेल भेटैत अछि। एकर एकटा नहि बहुत रास सूचक अछि। ओ कहला जे हम आइ जे किछु छी से एहि ठाम स संबंध हेबाक कारण स छी। श्री सिंह कहला जे आइ एहि मुकाम तक पहुंचबा मे जेतबा योगदान हमर पैतृक धरती सुपौल क अछि ओतबे मधुबनी क शंभुआड़ क धरती क अछि। ओ कहला जे नाना क डीह पर आबि हम आन भगिनमान जेकां भावविभोर छी। हमरा नैनपन क बहुत किछु संस्मरण आइ आंखि क आगू आबि रहल अछि।
क्षेत्रक विकास पर गप करैत ओ कहला जे निर्मली स सुपौल रेल निर्माण कार्य धीमी गति स चलबाक सूचना हमरा एहि ठाम एलाक बाद पता चलल अछि। संगहि जनकपुर वाला सड़क क स्थिति सेहो नीक नहि अछि। एहि समस्या सब कए दूर करबाक प्रयास जरूर करब।
अपन नाना-नानी, मामा-मामी आ परिवार क अन्य सदस्य क संग राति बितेबा लेल मातृक आयल श्री सिंह स भेंट करबा लेल कईटा जनप्रतिनिधि सेहो आयल छलाह। नेता प्रतिपक्ष अब्दुल बारी सिद्दीकी कहला जे केन्द्रीय गृह सचिव आर.के. सिंह एहि धरती क गौरव छथि। हिनका सन पदाधिकारी भेटब मुश्किल अछि। विधायक रामदेव महतो कहला जे आइ हम सब धन्य छी जे भारत सरकार क गृह सचिव हहमर बीच छथि। विधान पार्षद विनोद कुमार सिंह कहला जे जाहि प्रकार स अहां शंभुआड़ क लोक कए मान बढेलहुं अछि ओहिना एहि क्षेत्र क विकास क गति सेहो बढेबा मे योगदान दी। विधायक फैय्याज अहमद कहला जे श्री सिंह आइ जाहि पद पर छथि ओहि ठाम गिनल-चुनल लोक पहुंचैत अछि, मुदा अपन संस्कृति आ संस्कार कए अपना मे बसा रखनिहार श्री सिंह स उम्मीद अछि जे ओ मिथिला लेल एहन काज करताह जे एकरा नव जीवन प्रदान करत।
maithili news, mithila news, bihar news, latest bihar news, latest mithila news, latest maithili news, maithili newspaper
