दोसरसमाचार
नई दिल्ली । राजदक अंतःपुर स भेट रहल संकेत अगर सच भेल त राजद उपाध्यक्ष आ वैशाली स सांसद रघुवंश प्रसाद सिंह पार्टी क नव कार्यकारी अध्यक्ष हेताह। जानकारक कहब अछि जे विधानसभा चुनाव मे ऐतिहासिक हार क बाद लालू प्रसाद आम राय स काज करबा लेल तैयार छथि। संगहि वो पार्टी मे अपन सत्ता बचेबा लेल अधिकारक विकेद्रीकरण करबाक सोचि रहल छथि। दरअसल लालू एक तीर स कईटा निशाना लगेबा मे लागल छथि। एहि क्रम मे पहिने ओ मुस्लिम नेता अब्दुल बारी सिद्धिकी कए विपक्ष क नेता बनेलाह आओर हुनकर जगह पर बुजुर्ग नेता रामचंद्र पूर्वे कए प्रदेश अध्यक्ष बनेलाह। पिछड़ा आ मुसलमान क राजनीति कए साधबाक बाद आब ओ पार्टीक एकटा महत्वपूर्ण पद उच्च जाति कए देबाक फैसला केलथि अछि।
चुनावक बाद लालू क पार्टी राष्ट्रीय जनता दल क कईटा नेता चाहैत छथि जे ओ राष्ट्रीय अध्यक्ष क पद स इस्तीफा दथि। पार्टी मे लालू क प्रति निष्ठावान नेता क सेहो सोचब अछि जे ओ एहन पेशकश करथि, बेशक पार्टी एकरा खारिज करि देत या हुनका फेर स अध्यक्ष चुनि लेल जाइत, मुदा लालू एकरा लेल तैयार नहि छथि, ओ एकरा नजरअंदाज करैत रहलाह, मुदा हुनकर मुश्किल कम भेलाह बदला मे बढल जा रहल अछि। कहबा लेल इ पार्टी मे आम राय अछि, मुदा कियो बजैत नहि छल। अखलाखक मुंह खुजलाक बाद लालू पार्टी क भीतरक एहि चुप्पी कए दबेबाक स्थिति मे नहि छथि आ बीचक रास्ता निकालबाक प्रयास तेज करि देलाह अछि। लालू चाहैत छथि जे ओ अध्यक्ष बनल रहैथि आ ककरो कार्यकारी अध्यक्ष बना एहि मामला कए शांत करि देल जाए। एहन मे रघुवंश बाबू कए इ पद देबा सहमति बनि चुकल अछि। दोसर दिस कांग्रेस सेहो रघुवंश बाबू कए मन टटोलि चुकल अछि आ ओकरा निराशा हाथ लागल। एहन मे बुराडी सम्मेलन मे कांग्रेस एकला चलो क नीति पर फेर स विचार करबाक संकेत देलक अछि। कांग्रेस बिहार मे नेता विहीन अछि आ ओकर बुझबा मे आबि चुकल अछि जे ओकर गठबंधन सेहो नीतीश स नहि भ सकैत अछि। एहन मे ओकरा लेल राजद एकलौता विकल्प अछि। लालू क बजाए रघुवंश बाबू कए राजद क प्रतिनिधि बनेला स कांग्रेस कए गठबंधन पर गप आगू बढेबा मे सुविधा होएत। एहन मे राजद गठबंधन करबाक सन किछु अधिकार अपन कार्यकारी अध्यक्ष या कोर ग्रुप कए द सकैत अछि। कुल मिलाकए कहल जा सकैत अछि जे अगिला किछु दिन मे राजद मे भारी बदलाव देखबा मे भेट सकैत अछि। ओना एकर पुष्टि करबा लेल कोनो नेता तैयार नहि भेलाह अछि।
