दोसरसमाचार
पटना। बिहार शहरी आधारभूत संरचना विकास निगम(बुडको) कए बुनियादी ढांचा क निर्माण क संग-संग वित्तीय लेन-देन क अधिकार देबा लेल एकरा वित्त निगम क रूप मे विकसित करबा क फैसला लेल गेल अछि। एकरा बिहार अर्बन इंफ्रास्ट्रक्चर डेवलपमेंट एंड फाइनेंस कारपोरेशन (बुडएफको) क रूप मे बदलल जाएत। अगिला 20 साल मे बिहारक 139 शहरी निकाय क विकास लेल 56,489 करोड़ क आवश्यकता कए देखैत इ निर्णय लेल गेल अछि, जाहि पर कैबिनेट क मुहर लागब बाकी अछि।
बुडको बोर्ड क 15म बैसार में इ निर्णय सेहो लेल गेल अछि जे बुडएफको क अधीन कचरा प्रबंधन लेल एकटा शत प्रतिशत सहायक(सब्सिडियरी) कंपनी सेहो खोलल जाएत। एहि सबिसडियरी कंपनी क नाम ‘बिहार अर्बन सर्विस कारपारेशन’ रखबाक निर्णय लेल गेल अछि। कंपनी क शेयर पूंजी 5 लाख होएत जे 10 टकाक 50 हजार शेयर मे विभाजित कैल जाएत। हाल मे पटना नगर निगम ठोस कचरा प्रबंधन लेल बुडको कए एकटा स्पेशल पर्पस विहायकिल (एसपीवी) क माध्यम स काज करबाक जिम्मा सौंपलक अछि। बुडको क मानब अछि जे अन्य नगर निकाय स सेहो एहन प्रस्ताव भेट सकैत अछि।
केंद्रीय शहरी विकास मंत्रालय द्वारा गठित उच्चाधिकार सशक्त समिति अपन रिपोर्ट मे अनुमान लगेलक अछि जे देश मे स्थानीय शहरी निकाय मे आधारभूत क विकास लेल करीब 39,18,670 करोड़ क आवश्यकता होएत। बिहार मे 139 शहरी निकाय लेल अगिला 20 साल मे 56,489 करोड़ क पूंजीगत निवेश क जरूरत पडत। प्रदेश मे स्थानीय शहरी निकाय क वर्तमान आर्थिक स्थिति एहि निवेश कए एकमुश्त वहन करबा मे सक्षम नहि अछि। वित्त निगम क रूप मे बुडएफको निवेश क बाहरी स्त्रोत कए ताकत।
maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna
