पटना हवाई अड्डा पर भीड़ बढ़ल, आन शहरों से जहाज उड़ल
रेलगाड़ी क छुक-छुक क स्थान पर टेक ऑफ आ लैंडिंग आइ बिहार मे आम शब्द बनि गेल अछि। आब इंडियन एयरलाइंस,जेट, किंग फिशर, इंडिगो सन हवाई कंपनी विकास क पथ पर अग्रसर बिहार मे सेहो अपन भूमिका ताकि रहल अछि। आब विभिन्न कंपनी क अधिकारी, प्रतिनिधि, विभिन्न व्यवसाय स जुड़ल लोक बेधड़क पटना आबैत आ जाइत छथि । एकर जीबैत प्रमाण हवाई यात्रा करैवाला यात्री क संख्या आओर बढ़ैत आमदनी अछि।
पटना। एकटा जमाना छल, जहिया पटना हवाई अड्डा पर भरि दिन मे एक-आध टा हवाई जहाज उतरैत छल आ ओहि पर स किछु सवारी। मुदा आइ पटना हवाई अड्डा पर भीड़ बढि़ गेल अछि। पहिने जे प्रांगण खाली-खाली लगैत छल, लोक हवाई जहाज तक चलि जाइत छल। आब ओ प्रांगण छोट बुझबा जा रहल अछि। हवाई अड्डा क सुरक्षा सेहो काफी बढि़ गेल अछि। एतबा अंतर कोनो एक दशक मे नहि आयल अछि। पांच-छह साल पहिने, जतय पटना स मात्र पांचटा उड़ान छल, ओतहि आइ सातटा विमानन कंपनीक सब दिन 10टा उड़ान उपलब्ध अछि। पहिने पटना केवल दिल्ली स जुड़ल छल, मुदा आइ था, पटना स देश क कईटा शहर क लेल उड़ान उपलब्ध अछि। आइ पटना स मुंबई ,बेंगलुरु क दूरी महज किछु घंटा भरि कए रहि गेल अछि।
2004-05 मे पटना स नई दिल्ली सेक्टर क बीच विमानन कंपनी कए मात्र 16.5 करोड़ क आमदनी भेल । 2006-07 मे एहि सेक्टर स कंपनी कए आमदनी 28.5 करोड़ कए पार करि गेल। वर्ष 2002 मे पटना स नई दिल्ली, रांची आ कोलकाता क लेल विमान सेवा मौजूद छल। यात्री क बढ़ैत संख्या क असर अछि जे वर्ष 2009 मे एहि शहर क अलावा मुंबई, लखनऊ आ बेंगलुरु क लेल सेहो हवाई सेवा शुरू भ चुकल अछि। हवाई सेवा स जुड़ल दू टा पैघ कंपनी रांची, मुजफ्फरपुर, भागलपुर, पूर्णिया, दरभंगा आ मधुबनी सहित बिहार क अन्य शहर क लेल सेहो हवाई सेवा शुरू करबाक घोषणा कैलक अछि। किछु ठाम स सेवा शुरू भ चुकल अछि आ किछु ठाम अगिला माह स शुरू भ सकैत अछि। 2002 मे पटना स इंडियन एयरलाइंस, एयर सहारा आ जेट एयरवेज क विमान सेवा छल। 2005-06 मे एयर डेक्कन पटना स अपन हवाई सेवा शुरू केलक। चालू वर्ष मे इंडिगो क हवाई सेवा शुरू भ चुकल अछि। निकट भविष्य मे जेट एयरलाइंस आओर स्पिरिट एयरलाइंस क सेवा शुरू होइवाला अछि। कुल मिला कए इ कहल जा सकैत अछि जे किछु साल पहिने तक जतय पटना आ गया स लोक उड़ैत छल आइ पूरा बिहार उड़बा लेल तैयार अछि।
