दोसरसमाचार
पटना । बिहार मे विकास क संगहि युवा मे घर स भागि बियाह करबाक प्रवृति सेहो बढल जा रहल अछि । ‘प्रणय पलायन’ क कारण जतए दूटा परिवार थाना तक पहुंच रहल अछि, ओतहि मधुबनी सन शहर आगि मे झोंकल जा रहल अछि। देखल जाए त बिहार सब दिन ‘प्रणय पलायन’ क नौ टा स बेसी मामला दर्ज भ रहल अछि। पुलिस लेल इ एहन मामला अछि जेकरा ओ चाहियो कए रोकबा मे असमर्थ अछि।
उदारवाद क एहि युग मे बियाह क गप घर अगर नहि मानलक त इ पागलधनी सब एकर परवाह नहि करैत छथि जे घर स भगला पर परिवार आ समाज पर की प्रभाव पडत । कानून हाथ मे लेबा स सेहो हिनका सब कए कोनो हिचकिचाहट नहि । आंकडा कहैत अछि जे राज्य मे सब दिन ‘प्रणय पलायन’ क नौ टा स बेसी मामला दर्ज भ रहल अछि। पुलिस प्रशासन इ बुझबा मे असफल अछि जे एकरा कोना रोकल जाए ।
हत्या आ फिरौती लेल अपहरण क घटना कए जोडि देल जाए तखनो प्रणय पलायन क घटना ओकरा स कई गुणा बेसी अछि। आंकडा पर गौर करि त वर्ष 2012 मे प्रेम क चक्कर मे घर स भागबाक 405टा घटना दर्ज कैल गेल। एकरा अगर माहवार देखल जाए त जून मे सर्वाधिक 50टा आ अप्रैल मे सबस कम 21टा मामला सामने आएल।
कुल 405टा घटना मे महज तीनटा अनुसंधान क बाद गलत निकलल। प्रणय पलायन क दोसर रूप क स्थिति आओर बेसी गंभीर अछि। बियाह लेल अपहरण क घटना बिहार मे नव नहि अछि, मुदा पकरूआ बियाह क संग आब बियाह लेल युवती क अपहरण सेहो राज्य मे बढल अछि। वर्ष 2012 मे बियाह लेल अपहरण करबाक कुल 3007 घटना दर्ज कैल गेल। एहि मे स अधिकतर मामला प्रेम-प्रसंग स जुड़ल छल।
दूनू कए मिला देल जाए त प्रेम मे अपहरण आ घर स भागबाक कुल 3412टा मामला दर्ज भेल। इ संख्या, हत्या आ फिरौती लेल भेल अपहरण क घटना स तुलना कैल जाए त ओहि स कई गुणा बेसी अछि। बीतल वर्ष हत्या लेल अगवा करबाक 278टा आ फिरौती लेल अपहरण क मात्र 86टा मामला विभिन्न थाना मे दर्ज कराउल गेल, जाहि मे स 24टा गलत पाउल गेल।
पुलिस लेल प्रणय पलायन क घटना न केवल चुनौति बनल अछि बल्कि एकरा रोकबा लेल कोनो बाट नहि देखा रहल अछि। लड़की कए भगा ल जेबाक हालत मे ओकर परिजन सामान्यत: अपहरण क मामला दर्ज करेबा मे प्रयास करैत छथि, जाहि स अपहरण मामलाक अनुसंधान प्रभावित होइत अछि।
सब किछु पता रहलाक बावजूद पुलिस युवक क परिवार कए गिरफ्तार करैत अछि जिनका नामजद कैल जाइत अछि। अधिकतर मामला मे किछु दिन बाद प्रेमी-प्रेमिका बियाह क लौट अबैत छथि आ परिवार एकरा अपहरण नहि प्रणय पलायन मानि लैत अछि। मामला किशोरी या युवती स जुड़ल हेबाक कारण पुलिस कए अपहरण क मामला दर्ज करबाक मजबूरी रहैत अछि मुदा इ सब मानैत अछि जे एहन मामला मे काफी सावधानी बरतबाक चाही।
एकर अलावा अनजानी जगह पर प्रेमी-प्रेमिका कए कोनो गलत हाथ मे पड़बाक आशंका सेहो बनल रहैत अछि। आईजी (कमजोर वर्ग) अरविंद पांडेय कहब अछि जे तकनीकी रूप स अपहरण क एहि मामला मे अधिकतर प्रणय पलायन क होइत अछि, मुदा मामला दर्ज भेला पर पुलिस कानूनी प्रक्रिया क तहत कार्रवाई करैत अछि। चाहे, ओ प्रेम प्रसंग स जुडल हो या किछु आओर ।
maithili news, mithila news, bihar news, latest bihar news, latest mithila news, latest maithili news, maithili newspaper, darbhanga, patna, दरभंगा, मिथिला, मिथिला समाचार, मैथिली समाचार, बिहार, मिथिला समाद, इ-समाद, इपेपर
