दोसरसमाचार
ज्योति कुमारी
दरभंगा । केंद्रीय नागरिक उड्डयन राज्यमंत्री जयंत सिन्हा 24 नवंबर कए दरभंगा एयरपोर्ट पर सिविल सेवा शुरु करबा लेल निर्माण कार्य सह एयरबेस पर रनवे मरम्मतक काज शुभारंभ करताह। सूत्रक कहब अछि जे दरभंगा एयरबेस पर सिविल कार्य शुरु करबा लेल सबटा औपचारिता पूरा क लेल गेल अछि। 24 तारीख कए जयंत सिन्हा एकर शुभारंभ करताह आ अगिला छह मासक भीतर एहि काज कए पूरा क लेबाक लक्ष्य निर्धारित कैल गेल अछि।
उल्लेखनीय अछि जे दरभंगा एयरबेस कए सिविल सेवा लेल उपलब्ध करेबा लेल एनओसी वायुसेना पहिने द चुकल अछि जखन कि मोदी सरकारक उडान योजनाक तहत दरभंगा एयरपोर्ट स स्पाईजेट कंपनी दिल्ली, मुंबई आ बेंगलुरु लेल सेवा शुरु करबाक निविदा प्राप्त क चुकल अछि। मरम्मत लेल निकलल टेंडर मे किछु तकनीकी कारण स भेल गडबडीक कारण टेंडर कई बेर रद्द भ गेल छल, मुदा अंतत: पिछला मास दिल्लीक कंपनी पीआरआई प्रोजेक्ट इंफ्रास्ट्रक्टर प्राइवेट लिमिटेड एकर टेंडर प्राप्त केलक। कंपनी टर्मिनल भवन निर्माण आ एयरपोर्ट क रनवे अपग्रेडेशन क काज करत जेकर शिलान्यास 24 नवंबर कए होएत।
दोसर दिस करीब 38 साल पर बिहार क मुख्यमंत्री विमान स दरभंगा एलाह। नीतीश कुमार स पूर्व जगन्नाथ मिश्रा मुख्यमंत्रीक रूप मे दरभंगा हवाई जहाज स आयल छलाह। दरभंगा मे नीतीश कुमार दरभंगा एयरपोर्ट खुलबाक जरुरत पर बल देलथि संगहि कहला जे 30 एकड़ जमीन अलग स अधिगृहित क सरकार दरभंगा एयरपोर्ट कए देत जाहि स सिविल टर्मिनल नीक जेका तैयार भ सकै। उल्लेखनीय अछि जे मंगल दिन दरभंगा एयरबेस पर वायुसेना अपन जौहर देखेलक जेकर आयोजन बिहार मे पहिल बेर भेल छल।
पिछला 55 साल स सुस्त पडल दरभंगा एयरपोर्ट आइ काफी व्यस्त रहल। भोर मे वायुसेनाक एयरशो भेल जाहि मे हजारों लोग एयरबेस पर जा करतब देखलक। एयरशो खत्म भेलाक किछु काल बाद बिहारक राज्यपाल लालजी टंडन अपन विशेष विमान स दरभंगा एयरपोर्ट पहुंचलाह। टंडन स पूर्व बिहारक कौन राज्यपाल विमान स दरभंगा आयल छलथि इ ककरो स्मरण मे नहि अछि। राज्यपालक विमान उतरलाक किछु काल बाद मुख्यमंत्री नीतीश कुमार विशेष विमान स दरभंगा एयरपोर्ट पर उतरलाह। हुनका संग जदयू महासचिव संजय झा सेहो छलाह जे एयरपोर्ट लेल लगातार प्रयासरत रहलाह अछि। दरभंगा एयरपोर्ट पर बढल इ सक्रियता स आम लोक मे खुशी अछि आ उम्मीद बढल अछि जे शीघ्र एयरपोर्ट पर सेवा विमान सेहो उतरत।
