दोसरसमाचार
इन्द्रकान्त कए अनुवाद पुरस्कार
रौशन मैथिल
नई दिल्ली् । साहित्य अकादेमी, दिल्ली क मूल आ अनुवाद पुरस्कार क घोषणा गुरु दिन कए देल गेल । मैथिली मे साल 2017 क मूल लेखन क पुरस्कार भाषाविद् आ चर्चित कवि-नाटककार डा. उदय नारायण सिंह “नचिकेता” कए हुनकर काव्य-संग्रह “जहलक डायरी” लेल प्रदान कैल जाएत । ई जानकारी साहित्य अकादेमी मे मैथिली क प्रतिनिधि डा. वीणा ठाकुर देलथि । ओ बतेलथि जे पिछला 19 दिसंबर कए दिल्ली मे भेल निर्णायक मंडल क बैठक मे ई निर्णय लेल गेल । निर्णायक मे डा. व्रजकिशोर मिश्र, तुलाकृष्ण झा आ राजनन्दन लालदास शामिल छलाह । आय अकादमी क कार्यसमिति क बैठक क बाद एकरा घोषित कए देल गेल अछि । उल्लेखनीय अछि जे एहि पुरस्कार क तहत लेखक कए प्रतीक चिह्न आदि क संगे एक लाख टकाक चेक प्रदान कैल जाएत । अकादमी अलग से सम्मान समारोह आयोजित कए नचिकेता संगे अन्य भाषा क चयनित साहित्यकार कए पुरस्कृत करताह ।
मैथिली प्रतिनिधि डा. वीणा ठाकुर ई जानकारी देलथि जे साहित्य अकादेमी क साल 2017 क अनुवाद पुरस्कार लेल प्रो. इंद्रकांत झा क चयन गुजराती उपन्यास “अंगुलियात” क मैथिली मे अनुवाद क लेल देल गेल अछि । एहिक चयन निर्णायक मंडल मे शामिल पंचानन मिश्र, विजय कुमार चौधरी आ बैद्यनाथ झा केलथि । हिनका सेहो भारतीय भाषा क चुनल गेल आन साहित्यकार क संग अलग से समारोह आयोजित कए पुरस्कृत कैल जायत । हिनका अकादमी दिस से प्रतीक चिह्न आदि क संग पचास हजार टकाक चेक प्रदान कैल जाएत ।
दुनू साहित्यकार क चयन पर डा. योगानंद झा, अमलेन्दु शेखर पाठक, आनंद संस्था क डा. दिलीप कुमार झा संगे आन साहित्य सेवी ने प्रसन्नता व्यक्त करैत बधाई देलथि ।
