पटना। मिथिला पेंटिंग वाला मास्क क बाद आब बाजार मे धमाल करबा लेल सिक्की स बनल राखी उतराल गेल अछि। प्रधानमंत्री नरेंद्र मोदी क लोकल कए वोकल बनेबाक प्रयासक तहत मधुबनीक संस्था क्राफटवाला मिथिला क लोकशिल्प कए बाजार उपलब्ध करेबा मे लागल अछि। एहि प्रयासक तहत संस्था सिक्की स बनल राखी आनलाइन बाजार मे उतारबाक काज केलक अछि। पर्यावरण अनुकूल एहि राखीक सुंदरता अदभुत अछि, संगहि घर बैसल कम दाम मे उपलब्ध भ रहल अछि।
क्राफटवाला क प्रमुख राकेश झा एहि संबंध मे कहैत छथि जे जा धरि अर्थ स मिथिला के मजगूत नहि करब ता धरि भाखा आ साहित्य के आंदोलन अर्थहीन रहत। तैं मिथिला के आर्थिक क्रांति के सूत्रधार बनू जाहि स हमर अहाँ कए भैयारी कए रोजी रोटी वास्ते, अपन्न मैट पईन स दूर नय जाय परै जा धरि गाम मजगूत नय होयत ता धरि भाखा के बजनिहार कतअ स आनब। कटु गप्प छय मुदा सत्य यैह छै। बाद बाँकी कहै में आ सुनय में त जय मिथिला आ जय मैथिली सच्चे बड्ड नीक लगैत छय।
क्राफटवाला क काज पर टिप्पणी करैत पत्रकार पुष्यमित्र कहैत छथि जे राकेश झा नीक काज क रहल छथि। मिथिला पेंटिंग क मास्क कए त देश भरि क लोक पसंद केलक, हमरा लगैत अछि जे सिक्की क पर्यावरण मित्र राखी कए सेहो हमरा सब कए अपनेबाक चाही।
विज्ञापन आ पीआर क दुनियाक बादशाह आ मोदी है तो मुमकिन है सन नारा बनेनिहार राज झा कहैत छथि जे ग्रामीण महिला सब सबस शुभ धागा राखी बना रहल छथि। परंपरागत रूप स जे अहां क हाथ पर राखी बांधल जाइत अछि ओ बनेनिहारक अहां रक्षा करू। आजुक काल मे बहिन भाई कए हाथ मे तरह तरह कए राखी बांधैत अछि। एकटा दूरस्थ गांव कए बहिन सिक्की स राखी बना रहल छथि, घास क खरपात जे सुंदर अछि। हमरा सब कए एहि राखीक उपयोग करबाक चाही।
चुनाव आयोगक ब्रांड एम्बेसडर रहल मणिकांत झा कहैत छथि जे परम्परागत प्रकृति प्रदत सँ बनल ई राखी सरिपहुँ बड्ड अनमोल अछि। सिक्की आउर घास सँ बनल एहि राखीक पर्यावरणक संगे मजगूत बन्हन केर सम्बंध निर्वहन करबाक सशक्त उदाहरण कहब कोनो अतिशयोक्ति नहि । जहिना अदो काल सँ प्रकृति सँ मनुखक गहीरगर संबंध रहलैए आउर आगूओ जुग जुगान्तर शाश्वत रहतैक। ओहिना भाय-बहिनक सिनेहक मजगूत जोर एहि राखी केर कहल जाए, सैह उचित।
दोसरसमाचार
श्री झा सार्थक प्रयास लेल क्राफटवाला कए साधुवाद देलथि जे अपन मिथिलाक गौरवमय पहचान देश विदेश धरि पहुँचेबाक काज भ रहल अछि। ओ कहला जे एकरा मिथिलाक आर्थिक विकासक एकटा नव डेग कहल जा सकैछ। एहि प्रकारे निधोख कही त’ कुटीर उद्योग केर रुप मे लोक कलाक फेरो सँ स्थापित करबाक सराहनीय प्रयास । सभक सहयोग सँ मिथिलाकेँ आर्थिक सबल करबा मे हमरा लोकनि केर सेहो भागीदारी होएबाक चाही।
