पटना: बाढ़ि स’ भेल क्षतिक आकलन करय आयल छह सदस्यीय केंद्रीय अंतरमंत्रालयी टीम मानलक अछि जे बिहारमे जे बाढ़ि आयल अछि, इ सीवियर फ्लड सिचुएशन अछि. गोपालगंज, दरभंगा आ मुजफ्फरपुर जिलाक दौरा क’ लौटल केंद्रीय टीम राज्य सरकारक अधिकारी लोकनिक संग बैसकमे राहत आ बचाव काजक सराहना कयलक. राज्य सरकार बाढ़ि स’ भेल क्षतिक भरपाइक लेल केंद्र स’ 3328.60 करोड़ टाकाक मदति मांगत. एकरा लेल मेमोरेंडम तैयार कयल गेल अछि, मुख्यमंत्री नीतीश कुमारक सहमतिक बाद एकरा केंद्र सरकारके सौंपल जायत.
तैयार मेमोरेंडममे नोकसानक चर्चा
तैयार मेमोरेंडममे आपदा प्रबंधन विभागक 1,342.90 करोड़, कृषि विभागक 999.60 करोड़, पशु एवं मत्स्य संसाधन विभागक 2.96 करोड़, पथ निर्माण विभागक 70.01 करोड़, ग्रामीण कार्य विभागक 412.90 करोड़, जल संसाधन विभागक 483.92 करोड़ आ ऊर्जा विभागक 16.31 करोड़क नोकसानक चर्चा अछि.
आपदा प्रबंधन विभागक अपर सचिव रामचंद्र डू बतओलनि जे राज्य सरकार आरंभिक आकलनक आधार पर जे आंकड़ा देने छल, ओकर सम्बन्धमे केंद्रीय टीम एतय आयल छल. छह सदस्यीय टीम द्वारा दू-दू सदस्यक तीन टीम बना क’ गोपालगंज, मुजफ्फरपुर आ दरभंगामे ऑन स्पॉट फील्ड विजिट कयलक. संगहि लोक सभ स’ बात क’ नोकसानक बारेमे जायजा लेलनि. केंद्रीय दलके जे किछु संदेह छल, आधिकारिक बैसकमे ओहि पर विस्तार स’ चर्चा भेल. केंद्रीय दल किछु अतिरिक्त आंकड़ा सेहो मंगलक. राज्य सरकारक अधिकारी हुनका बतओलनि जे एखनहु बहुत ठाम पानि अछि, एहि लेल सड़क आ घरक क्षतिक संबंधमे पानि उतरलाक बादे वास्तविक आकलन क’ आंकड़ा उपलब्ध करायब संभव होयत.
गृह मंत्रालयक संयुक्त सचिव पीयूष गोयलक नेतृत्वमे आयल छह सदस्यीय टीममे सौरभ कुमार दुबे (निदेशक, ग्रामीण विकास मंत्रालय), दीपेंद्र कुमार (निदेशक, वित्त मंत्रालय ), बीरेंद्र सिंह ( निदेशक, कृषि विभाग), संजीव कुमार सुमन ( निदेशक, जल शक्ति मंत्रालय), प्रदीप कुमार लाल ( सुपरिटेंडेट इंजीनियर, भूतल परिवहन एवं राजमार्ग मंत्रालय) शामिल छलाह.
दोसरसमाचार
