दोसरसमाचार
पटना । भारतीय वायुसेना क पहिल तीनटा महिला पायलट मे स एकटा बिहार क भावना कंठ छथि। भावना मूल रूप स दरभंगा जिला क घमश्यामपुर क छथि, मुदा हिनकर पढाई लिखाई बेगूसराय में भेल अछि। 2400 किमी क रफ्तार स उडय़ बला भारतीय वायु सेना क शान सुखोई कए उड़ेबाक मौका अखैन धरि देशक पुरुष पाइलट्स टा कए भेटैत छल। मुदा महिला दिवस क अवसर पर एयरचीफ मार्शल अरुप राहा घोषण केलथि जे एहि साल 18 जून कए भारत क 3 टा महिला फाइटर प्लेन उडेबाक लाइसेंस पाबि लेतीह। पिछला साल अक्टूबर मे भारत सरकार महिला कए बतौर फाइटर पायलट वायूसेना मे लेबाक मंजूरी देने छल। भावना क चयन एयफोर्स एकेडमी, डुंडीगल मे 120 टा कडैट्स मे स कैल गेल अछि। जानकारी क अनुसार दरभंगा क घनश्यामपुर प्रखंड क बाउर गाम क भावना कंठ 18 जून स अवनी चतुर्वेदी आ मोहना सिंह संग फाइटर प्लेन उड़ौतीह। । एखन धरि भावना भारतीय वायुसेना मे भारी ट्रांसपोर्ट विमान आ हेलीकॉप्टर उड़बैत छलीह।
भावना कंठ अपन शुरुआती पढाई बेगूसराय क बरौनी रिफाइनरी डीएवी स्कूल स केने छथि। भावना क कहब अछि जे महिला लेल फाइटर पायलट बनब हरदम सही वक्त छल, मुदा आब एकर समय आयल अछि। ओ एकरा लेल सरकार कए शुक्रगुजार छथि। ओ कहलीह जे नैनपन स हुनका एकटा फाइटर पायलट बनाक इच्छा छल। परिवार क हुनका पूरा सपोर्ट भेटल। ओ कहलथि जे घर मे कहियो इ आभास नहि भेल जे हम बेटी छी आ इ सब काज बेटा करैत छै। एहि लेल किछु अलग सोची सकलहुं। ओ कहलीह जे एहि लेल बड कड़ा पशिक्षण होइत छै। एयरफोर्स एकेडमी में ट्रेनिंग भेटलाक बाद तीनटा फायलट क चयन भेल अछि। हमर अलावा मध्यप्रदेश क रीवा क अवनी चतुर्वेदी आ वडोदरा क मोहना सिंह देश सेहो फाइटर पायलट बनलीह अछि।
उल्लेखनीय अछि जे प्रथम विश्वयुद्ध मे दरभंगा महाराज ब्रिटिश सेना लेल हवाई जहाज दान देने छथि। बिहार मे पहिल हवाई जहाज 22 मार्च 1932 मे पूर्णिया मे उतरल अछि। 1950 मे दरभंगा एविएशन क स्थापना भेल अछि आ तिरहुत क पहिल पायलट दरभंगा क सुरेंद्र चौधरी भेलाह, जे एयर इंडिया क महाप्रबंधक भ सेवानिवृत भेलथि। जमीन अपन इतिहास फेर दोहरा देलक अछि। सुरेंद्र चौधरी स भावना कंठ तक क इतिहास हमर इतिहास छी। देश क पहिल महिला फायटर पायलट सेहो दरभंगा क भावना कंठ भेलीह। सुरेंद्र चौधरी दरभंगा एविएशन क जहाज दरभंगा एयरपोर्ट पर कई बेर उतारि चुकल छथि। उम्मीद करैत छी जे एक दिन भावना सुखोई उडा कए दरभंगा एयरबेस कए चूमबा लेल जरुर औतीह।
अति सुन्दर…
AAP PAR GARV HAIN