दोसरसमाचार
सुनील कुमार झा
नयी दिल्ली । दिल्ली में सत्तासीन आम आदमी पार्टी की सरकार कहलक अछि जे राज्यक सब स्कूल मे मैथिलीक भाषाक रूप मे पढाई होएत, जखन कि भोजपुरी कए 8वीं अनुसूचि मे शामिल करेबा लेल लडाई तेज होएत।
मैथिली भोजपुरी अकादमीक कार्यकरणीक बैसारक बाद पत्रकार स गप करैत उपमुख्यमंत्री मनीष सिसोदिया सरकार दिस इ घोषणा करैत कहला जे मैथिली भाषा आब दिल्ली मे 8वीं स 12वीं तक क बच्चा कए वैकल्पिक विषय क रूप मे पढ़ाउल जायत। ओ कहला जे उर्दू आ पंजाबी जेकां मैथिली भाषा सेहो स्कूल मे पढ़ाउल जायत। सरकारक एहि निर्णय स दिल्लीक मे मैथिली शिक्षकक बहाली होएत आ दिल्ली देशक एहन दोसर राज्य होएत जाहि ठामक स्कूल मे मैथिली भाषाक शिक्षक नियुक्त हेताह। मैथिली मे रोजगारक इ एकटा नव बाट खोललक अछि। श्री सिसोदिया एकर संगहि कहला जे दिल्ली सरकार आईएएस आ अन्य सिविल सेवा परीक्षा लेल जे कियो मैथिली विषय क कोचिंग चाहैत छथि हुनका लेल अकादमी ओ उपलब्ध कराउत। श्री सिसोदिया कहला जे मैथिली भाषा क अपन लिपि अछि मुदा ओ कंप्यूटर लेल उपलब्धि नहि अछि जाहि स ओकर प्रचार प्रसार नहि भ पाबि रहल अछि। एखन बेसीतर लोक नागरी लिपि मे मैथिली लिखैत छथि। दिल्ली सरकार मैथिली लेल तिरहुतिया लिपिक कंप्यूटर फॉन्ट् सेहो शीघ्र उपलब्ध हो ताहि लेल प्रयास तेज करत।
श्री सिसोदिया कहला जे मैथिली 8वीं अनुसूचि मे दर्ज अछि मुदा भोजपुरी एखन धरि इ स्थान नहि पाबि सकल अछि, जाहि स भोजपुरी मे पढाई आ सिविल सेवा सन परीक्षा मे एहि भाषाक समावेश नहि भ सकल अछि। संसद मे शपथ तक लेबा मे जनप्रतिनिधि कए बाधा पहुंच रहल अछि। दिल्ली सरकार आब भोजपुरी कए संविधान मे स्थान लेल लडाई कए तेज करत। ओ कहला जे एहन एहि भाषा सब लेल कोनो पुरस्कार नहि छल। आब मैथिली आ भोजपुरी कए बढ़ावा देबा लेल सरकार अवार्ड सेहो शुरू करत। एकरा लेल दूनू भाषा मिला कए कुल 12टा पुरस्कार देल जायत, जाहि मे साहित्य, पत्रकारिता आ लाइफ टाइम एचीवमेंट अवार्ड् शामिल अछि। लोकक भागीदारी बढ़ेबा लेल सरकार एहि साल मैथिली-भोजपुरी उत्सव दिल्ली क सबस प्रसिद्ध जगह कनाट प्लेस मे आयोजित करत। इ पूरा पांच दिन तक चलत। एहि अवसर पर मैथिली-भोजपुरी अकादमीक उपाध्यक्ष नीरज पाठक सेहो उपस्थित छलाह।
