सावित्री राय
दरभंगा । आखिरकार नीतीश कुमार क आग्रह केंद्र मानलक आ बिहारक दोसर एम्स दरभंगा मे खोलबा पर केंद्रीय मंत्रिमंडल अपन मुहर लगा देलक अछि। अगिला सप्ताह एकर अधिसूचना जारी क देल जायत। दरभंगा एयरपोर्ट क बाद मिथिला लेल मोदी सरकारक इ दोसर पैघ सनेस अछि। सूत्रक कहब अछि जे प्रधानमंत्री नरेंद्र मोदी दरभंगा एयरपोर्टक उदघाटन आ दरभंगा एम्स क शिलान्यास एक संग करताह। काफी वर्ष स बिहारक दोसर एम्स लेल जगहक चयन नहि भ सकल छल आ नीतीश सरकार दरभंगा मे एम्स बनेबा लेल जिद ठानी देने छल। केंद्रीय स्वास्थ्य व परिवार कल्याण राज्य मंत्री अश्विनी चौबे रविदिन कहने छलाह जे दरभंगा एम्स क सबटा प्रक्रिया पूरा क लेल गेल अछि। ओ कहला जे शनिदिन क राति मे ओ एम्स क फाइल पर साइन के देलथि अछि। सप्ताह भरिक अंदरएकर अधिसूचना जारी क देल जायत।
उत्तर बिहार लेल इ अस्पताल वरदान साबित होएत। ओ कहला जे काफी समय स उत्तर बिहार मे एम्स खोलबा पर विचार कैल जा रहल छल। जमीन क उपलब्धता क कारण मामला अटकल छल। बिहार सरकार दिस स प्रस्तावित जमीन क गुणवत्ता आ रास्ता क सुगमता सहित तीन बिन्दु पर मंत्रालय क तकनीकी कमेटी दरभंगा मेडिकल कॉलेज क जमीन क स्वीकृति पर मुहर लगा देलक अछि। राज्य सरकार नीच जमीन मे मिट्टी भरान आ ओवरब्रिज बनेबा लेल तैयार भ गेल अछि। अन्य औपचारिकता सेहो पूरा क लेल गेल अछि। आब केंद्र सरकार अधिसूचना जारी क देत।
मंत्री श्री चौबे कहला जे पटना क बाद बिहार क इ दोसर एम्स होएत। बेतिया स लकए सहरसा, सुपौल आ पूर्णियां तक क लोग लेल इ वरदान साबित होएत। संगहि पटना पर सेहो भार कम होएत। श्री चौबे मुजफ्फरपुर क एसकेएमसीएच मे नवनिर्मित वायरोलॉजी लैब क उदघाटन क बाद पत्रकार स गप क रहल छलाह। ओ कहला जे पटना एम्स अटल बिहारी वाजपेयी क देन छी आ दरभंगा एम्स प्रधानमंत्री नरेंद्र मोदी क देन होएत।
एम्हर केंद्रीय लोक निर्माण विभाग (सीपीडब्ल्यूडी) क महानिदेशक स्वास्थ्य मंत्रालय स अनुरोध केलथि अछि जे दरभंगा मे एम्स क भवन बनेबा क काज हुनकर एजेंसी कए देल जाये। सीपीडब्ल्यूडी क महानिदेशक प्रभाकर सिंह स्वास्थ्य एवं परिवार कल्याण मंत्रालय सचिव प्रीति सुदान कए पत्र लिखकए कहला अछि जे सीपीडब्ल्यूडी बिना कोनो परेशानी कए परियोजना कए पूरा क सकैत अछि।
दोसरसमाचार
केंद्रीय लोक निर्माण विभाग क महानिदेशक कहला जे मंत्रालय दरभंगा मेडिकल कॉलेज परिसर मे एम्स लेल नव भवन बनाउत। सिंह ने कहला जे हमरा लग बिहार मे काज करबाक अनुभव अछि। हम एहि काज कए करबा लेल सक्षम छी।
एम्स लेल डीएमसीएच क 200 एकड़ जमीन उपलब्ध
1878 मे दरभंगा मे तत्कालीन बंगालक दोसर सबस पैघ अस्पताल महाराजा लक्ष्मीश्वर सिंह खोलने छलाह। 200 बेडक ओहि अस्पताल मे नि:शुल्क ईलाजक देश मे पहिल बेर सुविधा देल गेल छल। 1938 मे बिहारक पहिल ऑपरेशन थियेटर एहि अस्पताल मे बनल आ एम्बुलेंस सुविधा सेहो सबसे पहिने दरभंगाक एहि अस्पताल मे देल गेल। 1925 मे दरभंगाक महाराजा रमेश्वर सिंह करीब 280 एकड जमीन पर दरभंगा मेडिकल स्कूल क स्थापना केलथि। 1946 में दरभंगा क तत्कालीन महाराजा कामेश्वर सिंह दरभंगा मेडिकल स्कूल कए दरभंगा मेडिकल कॉलेज एंव अस्पताल में बदलि देलथि। एहि संस्थान लग एखन कुल 227 एकड़ जमीन अछि। दरभंगा मेडिकल कॉलेज एंव अस्पताल कए 27 एकड़ जमीन क आवश्यकता छै, जे एकरा लग रहत, शेष 200 एकड़ जमीन एम्स लेल उपलब्ध कैल गेल अछि। केंद्र सरकार क नियम क अनुसार एम्स लेल न्यूनतम 150 एकड़ जमीन चाही, जखन कि दरभंगा मे एम्स लेल 200 एकड जमीन देल जा रहल अछि।
दरभंगा एम्स लेल सामूहिक प्रयास भेल। जलसंसाधन मंत्री संजय झा, दरभंगाक नगर विधायक संजय सरावगी लगातार एहि मसला कए उठबैत रहलाह। सांसद बनलाक बाद गोपाल जी ठाकुर सेहो एहि मसला कए गंभीरता स लेलथि। जालेक विधायक समेत कईटा अन्य विधायक सेहो एकरा लेल प्रयास केलथि। मुदा सबस महत्वपूर्ण रहल मुख्यमंत्री नीतीश कुमारक जिद, जाहि कारण स केंद्र सरकार दरभंगा मे एम्स खोलबा लेल तैयार भेल।
