दोसरसमाचार
स्पाइसजेट अपन ड्रीमलाइनर विमान कए दरभंगा मे उतारबाक क रहल अछि तैयारी
संतोष / सावित्री
दरभंगा । बहुप्रतीक्षित दरभंगा एयरपोर्ट पर विमान सेवा एक अगस्त स शुरु भ जायत। 1 मई स दरभंगा लेल अहां कंपनीक साइट स टिकट कटा सकैत छी। उडान योजनाक तहत 40 फीसदी सीटक किराया 3000 रुपया रहत। बाकी सीट लेल किराया मांग आधारित रहत।
बुधदिन दरभंगा मे भेल कंपनीक पहिल प्रेस कॉन्फेंस में स्पाइसजेट अपन योजनाक विस्तार स जानकारी देलक। स्पाइसजेटक प्रेस वार्ता मे जदयू नेता संजय झा सेहो उपस्थित छलाह।
बिहारक दोसर शेड्यूलड एयरपोर्ट पर उडान सेवा शुरु हेबाक घोषणा करैत कंपनीक वित्त प्रबंधक नवनीत कुमार कहला जे स्पाइसजेट दरभंगा स दिल्ली, मुंबई आ बेंगलुरु लेल सीधा विमान सेवा शुरू करत। ओ कहला जे पटना स यात्री कए किरासा संग टैक्स सेहो वसूल कैल जाइत अछि जखन कि दरभंगा स यात्री कए टैक्स नहि लागत जाहि स एहि ठामक किराया पटनाक मुकाबले कम रहत। दरभंगा कए छूट क फायदा भेटत। टिकट पटना स कहीं ज्यादा सस्त होएत। उल्लेखनीय अछि जे आरसीए क तहत जे सीट अछि तेकर शुरुआती किराया कंपनी 3000 तक वसूल सकैत अछि। एहन मे दरभंगा स दिल्ली, मुबई आ बेंगलुरु क किराया 3000 होएत।
पटना एयरपोर्ट पर कंपनीक प्रबंधक जे हसन कहला जे दरभंगा मे असीम संभावना देखा रहल अछि। ओ कहला जे दरभंगा मे सबस लंबा रनवे अछि जाहि कारण स एहि ठार कोनो विमान आसानी स उतरि सकैत अछि। पटना सन मजबूरी दरभंगा मे नहि अछि। दरभंगा मे कंपनी ड्रीमलाइनर सन पैघ जहाज कए सेहो उतारबाक योजना बना रहल अछि। कंपनी एखन पटना मे 189 सीटर विमान उतरि सकैत अछि मुदा दरभंगा मे हमसब ओहि स पैघ आकार कए जहाज उतारि सकैत छी। पैघ विमान उतरला स भविष्य मे टिकट आओर सस्त भ सकैत अछि। दरभंगा एयरपोर्ट पर चलि रहल काज पर संतोष व्यक्त करैत ओ कहला जे एहि रीजन मे कोनो एयरपोर्ट पर एतबा तेजी स काज होइत नहि देखल जेहन तेजी दरभंगा मे देखबा लेल भेटल अछि। पूरा उम्मीद अछि जे 1 मई स पहिने एयरपोर्ट क काज पूरा क लेल जायत। कंपनी टिकट बुकिंग सेवा शुरु हेबा स तीन माह पहिने शुरु क देत।
एहि मौका पर जदयू नेता आ एयरपोर्ट चालू करेबा मे महत्वपूर्ण भूमिका निभेनिहार संजय झा कहला जे विमान सेवा शुरु भेला स दरभंगाक नक्शा बदलि जायत। दरभंगाक आसपासक इलाकाक तेजी स विकास होएत। ग्रटर दरभंगा आ न्यू दरभंगा क विजन पर रोशनी दैत संजय झा कहला जे अगिला किछु साल मे शहरक जे विकास होएत ओ दरभंगा क एकटा नव इलाकाक रूप मे सामने आउत। एयरपोर्ट विकासक वाहक बनत आ निवेशक गति सेहो एहि स बढत। निश्चित रूप स दरभंगा आ उत्तर बिहार लेल इ एकटा सुभितगर संपर्कक स्रोत बनत।
