समदिया
इसमाद अपन दसम सालक यात्रा शुरु क रहल अछि । ई यात्रा असगर इसमाद क नहि अपितु एहि यात्रा मे ओ सभ शामिल छथि जे एहि स अपना कए जुड़ल महसूस करैत छथि, पाठक क रूप मे, आलोचक क रूप मे वा फेर मददगारक रूप मे। कैक बेर निराशा वा हताशा क दिन सेहो आएल, हमरा सबहक आर्थिक संकट सेहो झेलय पड़ल। मुदा ओ निराशा अहाँ सबहक प्रेम स बेसी दिन नहि टिक सकल। जखनकि उम्मीद रोज नब ऊर्जा प्रदान करैत रहल। आय जखन इसमाद दसम डेग उठेलक अछि अछि त ई मैथिली लेल एकटा कीर्तिमान सेहो हासिल कए लेने अछि । ई आत्मुग्घता नहि अछि आ नहि ई आत्मलब्धता अपितु मैथिली वा कोनो अखबार/पत्रिका लेल ओकर गतिशीलता ओकर ताकत होएत अछि आ आय हम सभ गर्व स कहि सकैत छी जे इसमाद परिवार ओहि गतिशीलता कए पेबा मे अंशत: सफल भ गेल अछि।
पिछला नौ साल मे हम पाठक क भरोसा हासिल केने छी । हुनकर विश्वास अर्जित केने छी । हम सदिखन पारंपरिक अखबार स इतर देबाक कोशिश केने छी। यैह कारण अछि जे इसमाद क हरेक खबरि तथ्यंपूर्ण आ आँकडा स भरल होएत अछि। यैह कारण अछि जे कोनो मैथिली अखबार क कंटेट अनुदित भए कए हिंदी वा अंग्रेजी क पोर्टल आ पत्रिका मे लगैत अछि। पिछला नौ साल मे इसमाद लए कए पाठकक अवधारणा सकारात्मक रहल अछि । एक बेर फेर हम दोहराबे चाहब जे हम खबरक निष्पक्षता क कोनो दावा नहि करैत छी। खबर कहियो निष्पक्ष नहि होएत अछि। ई पाठक पर निर्भर करैत अछि जे कोन खबर हुनकर पक्ष मे अछि आ कोन विपक्ष मे। हम खाली तथ्य क संग रहैत छी। आँकड़ा आओर तथ्य कए देखबाक हमर अपन नज़रिया होएत अछि। ओकर व्याख्या हम अपन सरोकार क हिसाब स करैत छी। प्रस्तुति क हमर अपन शैली अछि आ ई अखैन धरि पाठक कए पसिन आयल अछि। हम शुरू स कहैत आयल छी जे इसमाद कोनो दान वा भीख मे विश्वाास नहि करैत अछि। मुदा समाज स इहो आग्रह करैत अछि जे दस सालक एहि यात्रा कए आँगा बढ़ेबाक लेल सहयोग करि। तखने ई सिलसिला जिंदा रहि सकत । इसमााद क जिंदा रखबाक एक्के टा मकसद अछि जे मैथिल क बीच हमर सबहक संवाद जिंदा रहि सकय। मुदा ई कहिया धरि चलत एकर हम वा हमर टीम कोनो वादा त नहि कए रहल अछि मुदा जहिया धरि ई चलत अपन कंटेट आ अपन खबरि लेल ई सदिखन भीड़ स अलग ठाड़ रहत।
दस सालक एहि यात्रा मे कई टा लोकक परोक्ष आ अपरोक्ष रूप स योगदान अछि। मुदा सबसे बेसी योगदान ओहि सुधी पाठक क अछि जे एकर निरंतरता बनेबा मे सबसे बेसी योगदान देलथि। कोनो पोर्टल वा अखबार क भविष्य ओकर पाठक पर निर्भर अछि आ हमसभ एहि मे पूर्ण रूप स सफल भेलहूँ अछि। ओना इसमाद क दसम डेग एहिक संपूूर्ण टीम क समर्पण आ सहयोग क बिना सेहो अधूूरा छल। जों इसमाद आई पाठक क विश्वास पेबा मे अंशत: सफल भेल अछि त एकर श्रेय संपूर्ण टीम कए जाएत अछि। आगू क यात्रा लेल हाजिर छी हम…।
दोसरसमाचार
