बिहार क कईटा रंग अछि जाहि मे एकटा रंग ओकर कलाप्रेम सेहो अछि। जे एकर छवि कए रंगीन बनबैत अछि। पिछला किछु साल स बिहारक एहि रंग मे कमी आबि गेल छल। संगीतक मधुर रस हरा गेल छल। कलाकार बिहार एबा स कतरा रहल छलाह। सुरक्षा आ असभ्य व्यवहार क नाम पर एहि रंग कए बदरंग करबा मे कियो पाछु नहि छल। मुदा समय सब दिन एक रंग नहि रहैत अछि। आई पटना एक बेर फेर आरोह आ अवरोह मे डूबल अछि। एक दिस सिनेमा जगतक सबस पैघ चेहरा अमिताभ बच्चन पटनाक पाहुन बनल छथि त दोसर दिस शास्त्रीय संगीत क दिग्गज कलाकार सेहो लोक कए अपन संगीत आ गायन स सराबोर कए रहल छथि। कलाप्रेमी अपन कलाकारक झलक मात्र देखबा लेल सडक पर पांत मे ठार अछि। सवाल अछि इ बदलाव कोना भेल। लोक पर कोनो जादू असर नहि केलक अछि। बिहारक जनता मात्र ओ छवि स बाहर आबि गेलथि जे हुनका पर एक प्रकार स थोपल गेल छल। बिहारक कला प्रेम जगजाहिर अछि। एहन मे कलाकार स दूरी जनता आ कलाकार दूनू लेल दुखद छल। पिछला किछु साल मे इ दूरी एतबा बढि चुकल छल जे पैघ कलाकार क कार्यक्रम सूची मे बिहारक चर्च तक बंद भ गेल छल। लाख कोशिशक बावजूद पैघ कलाकार बिहार एबा स मना करि दैत दलाह। हाल मे सिनेमा जगतक चर्चित नाम सलमान खान बिहार एबा स एहि लेल मना करि देलथि जे हुनका अपन सुरक्षा पर संदेह छल।
थियेटर क अभिनेत्री क पैर देखि प्रणाम करिनिहार हिरामन सन बिहारी चरित्र कए हिंदी सिनेमा एतबा असभ्य बना देलक जे ओ परदा पर अपन कनिया-बेटी तक कए बेचवा लेल तैयार भ चुकल छल। हिरामन कए बच्चू यादव बनबा मे समय लागल आ एहि दूनू किरदारक अलावा सेहो बहुत रास किरदार पैदा भेल जे बिहारी क एकटा असभ्य छवि कए समाज मे स्थापित केलक। जाहि मे अमिताभक योगदान सेहो उल्लेखित अछि। इ अलग गप अछि जे एकटा कलाकार लेल अभिनय आ संवाद ओकर निजी मत नहि होइत अछि, तखनो अमिताभ इकलौता कलाकार छथि जे बिहारक गलत छवि परदा पर रखबा लेल क्षमा तक मंगने छथि। ताहि लेल हुनक बिहार क पाहुन बनबाक खास मायने सेहो अछि। बिहार स कतरा रहल कलाकारक बीच बच्चन परिवार स जूनियर बच्चन बिहार आबि एहि धारणा कए खंडित करबाक पहिल प्रयास केलथि जे बिहार विहार योग्य अछि। अपन एक दिनक कार्यक्रम कए ओ दू दिन तक बढा लोक कए इ संदेश सेहो देलथि जे राति मे रहब सेहो सुरक्षित अछि। मुदा एहि ठाम सवाल जूनियर क छल। अभि एखन बिहार क चरित्र पर लगाउल गेल एहि दाग कए मिटेबा लेल ओतबा समर्थ नहि भ सकला अछि, ताहि लेल बिगबी क एहि यात्रा क मायने अलग भ जाइत अछि। अमिताभ क दू दिन बिहार मे रहब केवल सलमान खान सन कलाकार लेल नहि बल्कि बिहार क प्रति गलत धारणा रखनिहार सब गोटे लेल एकटा ठोस संकेत अछि जे बिहार विहार योग्य अछि। बाजार क भाषा मे बिग बी एहि राज्य क ब्रांड अम्बेसडर (हित-प्रवर्तक) विधिवत बनथि बा नहि बनथि मुदा हुनकर बिहार दौरा अपना आप मे बिहार क ब्रांडिंग करि सकैत अछि। बिहार क प्रति हुनकर ताजा अनुभव प्रदेश लेल कई प्रकार स सहायक भ सकैत अछि। ओ जाहि रूप मे ट्वीटर सन आधुनिक माध्यम पर बदलैत बिहार स भेटल खुशगवार अनुभव क जिक्र केलथि अछि ओ एकर एकटा नमूना अछि। एतबे नहि ओ अपन ब्लॉग पर सेहो लिखलथि अछि जे हम सिनेपोलिस गेलहुं आ एकटा प्रेस सम्मेलन मे शामिल भेलहुं। इ प्रेस सम्मेलन बहुत सभ्य आ अनुशासनात्मक तरीका स संपन्न भेल। हमरा मुख्यमंत्री नीतीश कुमार सेहो बड सरल आ विनम्र व्यक्ति लगलाह। अमिताभ क इ गप परदा पर स मन मे उतरल बिहारी चरित्र बच्चू यादव कए खत्म करबा मे सहायक बनत आ एक फेर लोकक मन मे हिरामन स्थापित होएत। अमिताभ एकटा एहन शिखर व्यक्तित्व भ चुकल छथि जिनका स्पर्श मात्र स ककरो छवि बदलि सकैत अछि। हुनक एहि यात्रा क अनुभव भ सकैत अछि पैघ फैसला करनिहार सक्षम किछु लोक कए हुनकर नजरि स बिहार कए देखबा या रुचि लेबा मे सहायक बने। मुदा एतबा स जरूर जे बिहार कए असुरक्षित आ असभ्य कहि कए आब नजरअंदाज नहि कैल जा सकैत अछि।
sampaadkeeya bahut sateek lagal .dhanyabaad
kekro chhavi 1 ya 2 ta lokak prayaas se nai neek athawa kharaab hoit chhaik. sammilit praayasak aavashyakta chhaik.. bihar Neek hoyat aasha nahi poorna vishwaas aichh… Ati sundar sampaadkeeya….. Dhanyavaad.