दोसरसमाचार
ज्योत्सना मिश्रा
पटना। बिहार राज्य पथ परिवहन निगम बुध दिन के ‘चलो’ के संग एमओयू साइन कएल। निगम प्रशासक श्याम किशोर के मौजूदगी में बीएसआरटीसी के प्रशासन मुख्य अनु कुमार आ चलो के मार्केटिंग प्रमुख ध्रुव चोपड़ा के बीच संपन्न एहि एकरारनामा सँ निगम के पटना नगर सेवा के बस सबमें इलेक्ट्रॉनिक टिकटिंग मशीन, चलो एप मोबाइल पब्लिक इंफाॅर्मेशन सिस्टम, प्री पेड कार्ड, मंथली पास, स्टूडेंट पास आ व्हेकिल ट्रैकिंग सिस्ट्म जेहन सेवा जे कि पहले सँ चलो एप द रहल छल, ओ आगु सेहो अनवरत जारी रहत। संगे एहिके आरो विस्तार देनाय संभव होयत आ भविष्य में पूरा प्रदेश के लेल सेहो एकर इस्तेमाल कयल जाएत। चलो बीएसआरटीसी के लेल एक वेबसाइट के संचालन सेहो करत। पटना शहर में दू लाख लोकक द्वारा एखन तक चलो एप डाउनलोड कयल जा चुकल अछि। 20 हजार यात्रीक चलो कार्ड लेलथि जेकर नियमित इस्तेमाल भय रहल अछि।
एमहर, आब बीएसआरटीसी अपन लंबा दूरी बला बस सबमें वाईफाई के सुविधा देत। भारत-नेपाल बस सेवा आ अंतरराज्यीय बसमें इ पहले चरण में देल जायत। एहिके संगे निगम अपन बेसी दूरीवाला बस में स्थानीय आंचलिक गीत सेहो बजाओत। एहिके अंतर्गत सारण आ चंपारण प्रमंडल के डिपो सँ निकलय बला बस में भिखारी ठाकुर के गीत सुनाई देत। जखनकि दरभंगा, मधुबनी, सहरसा आदि मैथिल क्षेत्र में स्थित डिपो स निकलय बला बस में मैथिल भाषा में रचित गीत सुनाई पड़त। साथे कवि सत्यनारायण रचित बिहार गीत आ राज्य प्रार्थना धीमे संगीत के साथ सुनाई पड़त।
महीनाक अंत तक भेट जायत 70 बस : एहि महीनाक अंत तक 70 बस निगम के बेड़ा में शामिल भय जायत। एहिमें 15 लग्जरी, 30 सेमी डीलक्स आ 25 डीलक्स बस होयत। 15 जनवरी के बाद निगमक डीलर प्वाइंट पर एहि बस के पहुंच जायबाक संभावना अछि। साथे 50 सीएनजी बसक खरीद के आदेश सेहो देल गेल अछि। साथे डिसएबल फ्रेंडली 20 सीएनजी लग्जरी बसक खरीद के निविदा सेहो जेम पोर्टल पर प्रकाशित कयल गेल अछि। जकरा भरय के अंतिम तिथि गुरुवार तक अछि। अगिला वित्तीय वर्ष में निगमक द्वारा 115 बस खरीदय के योजना अछि। जहिमे 15 लग्जरी, 50 सेमी डीलक्स आ 50 डीलक्स बस शामिल होयत। अहि ठाम शहरक प्रदूषण के कम करय के लेल 25 इलेक्ट्रिक बसक परिचालन सेहो बीएसआरटीसी एहि महीनाक अंत तक करय बला अछि।
