दोसरसमाचार
ज्योत्सना मिश्रा
पटना। राज्य सरकार स्मार्ट सिटी परियोजना के द्वारा चयनित शहर के हाइटेक तरीका सँ स्मार्ट बनाबय के तैयारी में जुटि गेल अछि। एहि के लेल शुरुआत में दू टा शहर पटना आ बिहारशरीफ के चयन कयल गेल अछि।
एहि दुनू शहर में हाइटेक सर्विलांस सिस्टम के तहत पूरा शहर के सब स्थान पर विशेष तरह के कैमरा लगाबय के योजना अछि। एहि ऑटोमेटिक नंबर प्लेट रेकॉग्नाइज (एएनपीआर) कैमरा सबहक मदद सँ कोनो गाड़ी के नंबर सँ ओकरा बारे में पूरा जानकारी निकालल जायत। एहि खास तरीका के कैमरा मुख्य रूप सँ गाड़ी सबमें लागल हाइ सिक्योरिटी नंबर प्लेट आ एहि पर साटल होलोग्राम स्टीकर के मदद सँ कोनो तरह के गाड़ी के ट्रेस क सकैत अछि। गाड़ी कतबो रफ्तार में कियैक ने होई, इ बेहद आधुनिक कैमरा होईत अछि आ गाड़ी पर लागल नंबर प्लेट के पढि कय एकरा अपन मेमोरी में सुरक्षित कय लेत अछि। संगहि एहि आधार पर इई पूरा जानकारी सेहो निकालि सकैत अछि। ई सब कैमरा इंटरनेट आ एक समेकित कंट्रोल सेंटर स जुड़ल रहत। एहि कैमरा के समुचित मॉनीटरिंग आ कंट्रोल करय लेल दुनू शहर में एगो हाइटेक कंट्रोल सेंटर बनाओल जायत।नगर विकास एवं आवास विभाग के तहत संचालित होबयवला वला स्मार्ट सिटी परियोजना के माध्यम सँ इ कैमरा लगाओल जा रहल अछि ।
करीब 100 करोड़क खर्च आयत
एहिमे केंद्र के स्तर स जारी निर्भया फंड के खर्च करय के योजना अछि। पूरा योजनाक तैयार होबय में लगभग 100 करोड़ के खर्च आयत। इ अपन तरह के विशेष प्रकारक कैमरा अछि, जहिसऽ पहिल बेर सुरक्षा व्यवस्था आ समुचित चौकसी के लेल शहर में इंस्टॉल कयल जा रहल अछि। एहि कैमराके लगाबय सँ पहिले दुनू शहर के पूरा मैपिंग कयल जायत आ एहिके आधार पर ओ सब स्थान के चिन्हित कएल जायत, जतय इ लगेबाक कार्य होतय। सब स्थिति के समीक्षा कयलाक बादे इई अंतिम रूप सँ लगाबय के प्रक्रिया सुरू होयत।
होएत खास फायदा
एहि विशेष हाइटेक कैमरा के मदद सँ शहर के चप्पा-चप्पा पर नजर राखल जाएत। एहिके लेल एक कंट्रोल सेंटर हेतय, जतय सँ कोनो स्थान पर कोनो घटना हुअ पर तुरंत एहिके सूचना संबंधित थाना के देल जायत,ताकि अय पर त्वरित कार्रवाई भय सकय। शहर में लूट या अन्य कोनो तरह के वारदात होबय पर एहिके विषय में समुचित जानकारी भेट सकत। गाड़ी नंबर के आधार पर कोनो अपराधी के पकड़नाय बहुत आसान भय जायत। कोनो वारदात के बाद गाड़ी सँ कोनो अपराधी के शहर में हुअ वला सब गतिविधि या मूवमेंट के बारे में सेहो समुचित जानकारी भेट जायत।
